इस्रायलने नॉर्थ ईस्ट भारतातील उर्वरित 5,800 ज्यू नागरिकांना इस्रायलमध्ये आणण्यास मंजुरी
इस्रायल सरकारने ईशान्य भारतातील ब्ने मेनाशे म्हणून ओळखल्या जाणाऱ्या ज्यू समुदायातील उर्वरित 5,800 सदस्यांना पुढील पाच वर्षांत इस्रायलमध्ये स्थलांतरित करण्याच्या प्रस्तावाला मंजुरी दिली आहे. ही घोषणा रविवारी करण्यात आली असून ती “महत्त्वपूर्ण आणि मोठ्या प्रमाणात राबविण्यात येणारी योजना” असल्याचे इस्रायलच्या ज्यू एजन्सीने सांगितले.
ईशान्य भारतातील मणिपूर आणि मिझोरामसह विविध राज्यांमध्ये राहणाऱ्या ब्ने मेनाशे समुदायाने प्राचीन इस्रायलच्या हरवलेल्या वंशाशी आपला संबंध असल्याचा दावा अनेक वर्षांपासून केला आहे. या दाव्यावर अनेक वर्षे वाद सुरू होते. मात्र 2005 मध्ये सेफार्दी समुदायाचे तत्कालीन मुख्य रब्बी रब्बी श्लोमो अमर यांनी ब्ने मेनाशेला “इस्रायलचे वंशज” म्हणून मान्यता दिली. यानंतर या समुदायाला इस्रायलमध्ये स्थलांतराचे दार खुलं झालं.
गेल्या दोन दशकांत या समुदायातील हजारो लोकांनी इस्रायलमध्ये स्थलांतर करून तेथे धार्मिक प्रक्रिया आणि समावेशनाच्या नियमांनुसार आपले जीवन सुरू केले आहे.
सरकारच्या नव्या निर्णयामुळे या स्थलांतर प्रक्रियेची अखेरची मोठी पायरी पूर्ण होणार आहे. पुढील पाच वर्षांत टप्प्याटप्प्याने या 5,800 नागरिकांना इस्रायलमध्ये आणण्यासाठी औपचारिक कागदपत्रे, वाहतूक आणि पुनर्वसनाची व्यवस्था केली जाणार आहे.
ही घोषणा ब्ने मेनाशे समुदायासाठी ऐतिहासिक निमित्त ठरत असून त्यांच्या दीर्घकाळाच्या स्वप्नपूर्तीतील महत्त्वाचा टप्पा मानला जात आहे.
