हिमाचलमध्ये भीषण बस अपघात: मंडीजवळ दरीत कोसळून ५ ठार, २० हून अधिक जखमी

हिमाचल प्रदेश: हिमाचल प्रदेशातील मंडी जिल्ह्यात सरकाघाटजवळ तरांगला येथे आज सकाळी १० वाजण्याच्या सुमारास एक भीषण अपघात घडला आहे. एचआरटीसी (HRTC) ची एक प्रवासी बस दरीत कोसळल्याने हा मोठा अपघात झाला.

अपघाताच्या वेळी बसमध्ये सुमारे २५ प्रवासी होते. या दुर्घटनेत ५ प्रवाशांचा जागीच मृत्यू झाला असून, २० हून अधिक प्रवासी गंभीर जखमी झाले आहेत. मृतांमध्ये २ पुरुष आणि ३ महिलांचा समावेश आहे.

अपघात घडताच, स्थानिक नागरिकांनी तात्काळ मदतकार्य सुरू केले. घटनेची माहिती मिळताच पोलीस आणि १०८ रुग्णवाहिका तात्काळ घटनास्थळी दाखल झाल्या. जखमींना तातडीने जवळच्या रुग्णालयात हलवण्यात आले असून त्यांच्यावर उपचार सुरू आहेत. या अपघाताचे कारण अद्याप स्पष्ट झालेले नाही, मात्र पोलिसांनी घटनेचा तपास सुरू केला आहे.