अवघ्या ५ तासांत घरफोडीचा छडा! कळमणा पोलिसांची धडाकेबाज कारवाई; दोन आरोपी अटकेत

ओम नगरातील घरफोडी प्रकरणाचा पर्दाफाश; २ लाख ५० हजारांचे सोन्याचे दागिने हस्तगत, सीसीटीव्ही आणि गोपनीय माहितीच्या आधारे आरोपी जेरबंद
नागपूर | प्रतिनिधी
नागपूर शहरातील कळमणा पोलीस ठाण्याच्या हद्दीत झालेल्या घरफोडीच्या गुन्ह्याचा पोलिसांनी अवघ्या पाच तासांत छडा लावत दोन आरोपींना अटक केली आहे. ओम नगर परिसरातील एका बंद घराचे कुलूप तोडून सोन्याचे दागिने आणि इतर साहित्य असा एकूण ३ लाख ९७ हजार ५०० रुपयांचा मुद्देमाल चोरी करण्यात आला होता. या घटनेनंतर कळमणा पोलिसांनी सीसीटीव्ही फुटेज, गोपनीय माहिती आणि तांत्रिक तपासाच्या आधारे आरोपींचा माग काढला. या कारवाईत चोरीला गेलेल्या सोन्याच्या दागिन्यांपैकी २ लाख ५० हजार रुपये किमतीचा मुद्देमाल हस्तगत करण्यात पोलिसांना यश आले आहे.

पोलिसांनी दिलेल्या माहितीनुसार, कळमणा पोलीस ठाण्याच्या हद्दीतील ओम नगर, सीताराम किराणा दुकानाजवळ राहणारे निशांत अरुण भाटी (वय ३६) हे १३ नोव्हेंबर २०२६ रोजी कुटुंबासह बाहेरगावी गेले होते. दरम्यान, १७ नोव्हेंबर रोजी ते घरी परतले असता घराच्या मुख्य दरवाजाचे कुलूप बदललेले दिसून आले. घरात प्रवेश करून पाहणी केली असता कपाटाचे कुलूप तोडलेले होते. कपाटातील सोन्याचे मंगळसूत्र, कानातील झुमके, सोन्याच्या दोन चेन, एक अंगठी, मालमत्तेची कागदपत्रे तसेच चारचाकी वाहनाची चावी असा एकूण ३ लाख ९७ हजार ५०० रुपयांचा मुद्देमाल चोरीला गेल्याचे निदर्शनास आले. याप्रकरणी त्यांनी कळमणा पोलीस ठाण्यात तक्रार दाखल केली. त्यावरून भारतीय न्याय संहितेच्या कलम ३०५(अ), ३३१(३) व ३३१(४) अन्वये गुन्हा नोंदविण्यात आला.

सीसीटीव्ही फुटेजमधून आरोपींचा माग
गुन्ह्याची माहिती मिळताच कळमणा पोलिसांनी तपासाला वेग दिला. गुन्हे प्रकटीकरण पथकाने घटनास्थळाला भेट देऊन परिसरातील सीसीटीव्ही कॅमेऱ्यांचे फुटेज बारकाईने तपासले. १५ नोव्हेंबर रोजी पहाटे २ ते २.३० वाजताच्या दरम्यान दोन संशयित इसमांची हालचाल सीसीटीव्ही फुटेजमध्ये दिसून आली. त्यानंतर गोपनीय माहिती आणि तांत्रिक तपासाच्या आधारे संशयितांची ओळख पटविण्यात आली.
या तपासात गौरव सचिन पालीवाल (वय १९, रा. ओम नगर, तलमले ले-आउट, सीताराम किराणा दुकानाजवळ, कळमणा) आणि वैभव ऊर्फ बाबू किशोरीलाल शाहू (वय २१, रा. ओम नगर, तलमले ले-आउट, सीताराम किराणा दुकानाजवळ, कळमणा) यांचा सहभाग निष्पन्न झाला. पोलिसांनी दोघांनाही ताब्यात घेऊन चौकशी केली असता त्यांनी घरफोडी केल्याची कबुली दिल्याचे प्रसिद्धीपत्रकात नमूद करण्यात आले आहे.
२ लाख ५० हजारांचे सोन्याचे दागिने हस्तगत
पोलिसांनी १८ नोव्हेंबर रोजी आरोपींकडून चोरी गेलेल्या मुद्देमालापैकी सोन्याचा हार वजन ४८.५५ ग्रॅम, अंदाजे किंमत २ लाख २५ हजार रुपये, तसेच कानातील लटकन असलेले सोन्याचे झुमके वजन ३.९४० ग्रॅम, अंदाजे किंमत २५ हजार रुपये, असा एकूण २ लाख ५० हजार रुपयांचा मुद्देमाल हस्तगत केला. त्यामुळे चोरी गेलेल्या सोन्याच्या दागिन्यांची मोठी रक्कम पोलिसांना परत मिळविता आली आहे.
आरोपींची गुन्हेगारी पार्श्वभूमी तपासात
अटक करण्यात आलेले दोन्ही आरोपी अभिलेखावरील गुन्हेगार असून, यापूर्वी त्यांच्याविरुद्ध घरफोडी व जबरी चोरीचे गुन्हे दाखल असल्याची माहिती पोलिसांनी दिली आहे. या आरोपींनी आणखी कोणते गुन्हे केले आहेत का, याचा तपास सुरू आहे. तसेच या प्रकरणातील तिसरा साथीदार वैभवप्रकाश ऊर्फ छोटू बळेश्वर याचा शोध पोलीस घेत आहेत.
वरिष्ठांच्या मार्गदर्शनाखाली कारवाई
पोलीस आयुक्त विश्वास नांगरे पाटील, सहपोलीस आयुक्त नवीनचंद्र रेड्डी, अपर पोलीस आयुक्त वसंत परदेशी, पोलीस उपायुक्त राहुल माकणीकर आणि परिमंडळ क्रमांक ५ चे पोलीस उपायुक्त रोहित ओहोळ यांच्या मार्गदर्शनाखाली ही कारवाई करण्यात आली.
कळमणा पोलीस ठाण्याचे वरिष्ठ पोलीस निरीक्षक प्रवीण काळे, पोलीस निरीक्षक (गुन्हे) करीम पठाण, पोलीस उपनिरीक्षक गजानन राऊत, पोलीस हवालदार प्रमोद कंगाले, विशाल भैसारे, पोलीस अंमलदार नितीन मिश्रा, ललित शेंडे, अविनाश गवळवंशी, रोशन निबेते व प्रवीण इनवाते यांनी या कारवाईत सहभाग घेतला.
घरफोडीचा गुन्हा उघडकीस आणून दोन आरोपींना अटक केल्याने कळमणा पोलिसांच्या या कामगिरीचे कौतुक होत आहे. शहरातील घरफोडी आणि चोरीच्या घटनांना आळा घालण्यासाठी पोलिसांकडून तपासाची व्याप्ती वाढविण्यात येत आहे.



