दूध आणण्यासाठी घराबाहेर पडलेल्या महिलेसोबत छेडछाड; चाकू दाखवून जीवे मारण्याची धमकी!
नागपुरातील शांतिनगर परिसरातील घटना; महिलेचा हात पकडून ओढल्याचा आरोप, करण जाधव आणि सचिन यादव यांच्याविरोधात गुन्हा दाखल
नागपूर : नागपूर शहरात महिलांच्या सुरक्षेचा प्रश्न पुन्हा एकदा ऐरणीवर आला आहे. दूध घेण्यासाठी घराबाहेर पडलेल्या महिलेसोबत दोघांनी गैरवर्तन करून शिवीगाळ केल्याची तसेच चाकू दाखवून जीवे मारण्याची धमकी दिल्याची गंभीर घटना शांतिनगर पोलीस ठाण्याच्या हद्दीत समोर आली आहे. यातील एका आरोपीने महिलेचा हात पकडून तिला स्वतःकडे ओढल्याचा आरोपही तक्रारीत करण्यात आला आहे. या प्रकरणी शांतिनगर पोलिसांनी करण जाधव आणि सचिन यादव या दोघांविरोधात गुन्हा दाखल केला असून पुढील तपास सुरू केला आहे.
पोलिसांनी दिलेल्या माहितीनुसार, १३ नोव्हेंबर २०२६ रोजी दिवसपाळी कर्तव्यावर असलेल्या पोलीस उपनिरीक्षक तनुजा मुजावर यांच्याकडे पीडित महिलेने तक्रार दाखल केली. संबंधित महिला सकाळी सुमारे ८.३० वाजताच्या दरम्यान दूध आणण्यासाठी घराबाहेर पडली होती. यावेळी करण जाधव आणि सचिन यादव या दोघांनी तिला अडवून शिवीगाळ केल्याचा आरोप आहे.
तसेच आरोपींनी चाकू दाखवून महिलेला आणि तिच्या भावाला जीवे मारण्याची धमकी दिल्याचे तक्रारीत नमूद करण्यात आले आहे. दरम्यान, आरोपी करण जाधव याने महिलेचा हात पकडून तिला स्वतःकडे ओढले. या प्रकारामुळे महिलेच्या मनात लज्जा उत्पन्न झाल्याचेही तक्रारीत म्हटले आहे.
या तक्रारीच्या आधारे शांतिनगर पोलीस ठाण्यात अपराध क्रमांक २६१/२६ अंतर्गत भारतीय न्याय संहितेच्या कलम ७४, २९६, ३५१ आणि ३(५) अन्वये दोन्ही आरोपींविरोधात गुन्हा दाखल करण्यात आला आहे.
या प्रकरणाचा पुढील तपास पोलीस उपायुक्त, सहाय्यक पोलीस आयुक्त आणि वरिष्ठ पोलीस निरीक्षक यांच्या मार्गदर्शनाखाली सुरू आहे. दिवसाढवळ्या महिलेसोबत घडलेल्या या प्रकारामुळे परिसरात चिंतेचे वातावरण असून महिलांच्या सुरक्षिततेचा मुद्दा पुन्हा चर्चेत आला आहे.
