आयुक्तांच्या चेंबरमध्ये सोडली कुत्र्यांची पिल्ले! भटक्या कुत्र्यांच्या प्रश्नावर भीम ब्रिगेडचे अनोखे आंदोलन
अमरावती मनपा प्रशासनाचे लक्ष वेधण्यासाठी थेट आयुक्तांच्या दालनात आंदोलन; कुत्र्यांचा बंदोबस्त करण्याची मागणी, अन्यथा तीव्र आंदोलनाचा इशारा
अमरावती : अमरावती शहरात भटक्या कुत्र्यांची वाढती संख्या आणि नागरिकांवर होणाऱ्या कुत्र्यांच्या हल्ल्यांच्या घटनांमुळे नागरिकांमध्ये चिंता आणि संताप वाढत आहे. या गंभीर प्रश्नाकडे महानगरपालिका प्रशासनाचे लक्ष वेधण्यासाठी भीम ब्रिगेड संघटनेने अनोख्या पद्धतीने आंदोलन केले. संघटनेच्या कार्यकर्त्यांनी थेट महानगरपालिका आयुक्तांच्या चेंबरमध्ये कुत्र्यांची पिल्ले सोडून प्रशासनाचा निषेध नोंदविला. या अनोख्या आंदोलनामुळे मनपा परिसरात एकच खळबळ उडाली.
शहरातील विविध भागांत भटक्या कुत्र्यांची संख्या वाढत असल्याने नागरिकांना रस्त्यावरून ये-जा करताना भीतीचे वातावरण निर्माण झाले आहे. लहान मुले, ज्येष्ठ नागरिक आणि पादचाऱ्यांच्या सुरक्षिततेचा प्रश्नही ऐरणीवर आला आहे. कुत्र्यांच्या हल्ल्यांच्या घटनांमुळे नागरिकांच्या सुरक्षेसाठी महानगरपालिकेने तातडीने उपाययोजना कराव्यात, अशी मागणी भीम ब्रिगेड संघटनेकडून करण्यात येत आहे.
याच पार्श्वभूमीवर संघटनेच्या कार्यकर्त्यांनी थेट आयुक्तांच्या दालनात कुत्र्यांची पिल्ले सोडून प्रशासनाचे लक्ष वेधण्याचा प्रयत्न केला. भटक्या कुत्र्यांच्या समस्येवर केवळ आश्वासने न देता प्रत्यक्ष उपाययोजना कराव्यात, अशी भूमिका आंदोलकांनी मांडली.
यावेळी भीम ब्रिगेडचे अध्यक्ष राजेश वानखेडे यांनी महानगरपालिका प्रशासनाने भटक्या कुत्र्यांचा तातडीने बंदोबस्त करावा आणि नागरिकांची सुरक्षितता सुनिश्चित करावी, अशी मागणी केली. तसेच या प्रश्नाकडे दुर्लक्ष सुरूच राहिल्यास यापेक्षाही तीव्र आंदोलन छेडण्यात येईल, असा इशाराही त्यांनी दिला.
शहरातील भटक्या कुत्र्यांच्या वाढत्या समस्येवर कायमस्वरूपी उपाययोजना करण्याची जबाबदारी आता महानगरपालिका प्रशासनासमोर आहे. त्यामुळे या आंदोलनाची आयुक्त कितपत दखल घेतात आणि नागरिकांच्या सुरक्षेसाठी कोणती ठोस पावले उचलतात, याकडे अमरावतीकरांचे लक्ष लागले आहे.
