अमरावती-दर्यापूर मार्गावर भीषण अपघात; दोन युवकांचा मृत्यू
म्हैसपूर फाट्याजवळ आयशर ट्रकची दुचाकीला धडक; अपघातानंतर चालक फरार
अमरावती-दर्यापूर राज्य मार्गावरील म्हैसपूर फाट्याजवळ आयशर ट्रकच्या धडकेत दोन युवकांचा दुर्दैवी मृत्यू झाला. रविवारी, ११ ऑक्टोबर रोजी सायंकाळी साडेसात वाजण्याच्या सुमारास हा अपघात घडला. ऋषिकेश संजय म्हैसणे आणि संकेत गोपाल अवतीकार अशी मृत युवकांची नावे असून, दोघेही अकोला जिल्ह्यातील बाळापूर तालुक्यातील देगाव येथील रहिवासी होते. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, म्हैसपूर फाट्याजवळ आयशर ट्रकने दोघा युवकांना धडक दिली. या भीषण अपघातात दोघांचाही मृत्यू झाला. अपघातानंतर ट्रकचालक घटनास्थळावरून फरार झाला. घटनेची माहिती मिळताच पोलिसांनी प्रकरणाची दखल घेतली असून, फरार ट्रकचालकाचा शोध सुरू केला आहे.
या अपघाताचा पुढील तपास खोलापूर पोलीस करीत आहेत. फरार ट्रकचालकाचा शोध घेण्यासह अपघाताच्या नेमक्या कारणांचा तपास केला जात आहे. दोन युवकांचा अपघाती मृत्यू झाल्याने त्यांच्या कुटुंबीयांवर दुःखाचा डोंगर कोसळला असून, देगाव परिसरात शोक व्यक्त केला जात आहे.
