बडनेरात अँटी गुंडा पथकाची मोठी कारवाई; गंभीर गुन्ह्यांतील ३ वॉरंट आरोपी ताब्यात
खून, खुनाचा प्रयत्न यांसारख्या गुन्ह्यांत होते फरार; तडीपार आरोपीही हद्दीत आढळल्याने स्वतंत्र कारवाई
अमरावती | बडनेरा : खून आणि खुनाचा प्रयत्न यांसारख्या गंभीर गुन्ह्यांमध्ये फरार असलेल्या तसेच प्रमुख जिल्हा व सत्र न्यायालय, अमरावती यांनी अटक वॉरंट काढलेल्या तीन आरोपींना अँटी गुंडा पथक परिमंडळ-१, अमरावती यांनी सापळा रचून ताब्यात घेतले आहे.
पोलीस उपायुक्त परिमंडळ-१ यशवंत साळुंखे यांच्या आदेशानुसार न्यायालयाने अटक वॉरंट काढलेल्या आरोपींचा शोध घेण्यासाठी अँटी गुंडा पथकाकडून विशेष मोहीम राबविण्यात आली. गुप्त माहितीच्या आधारे बडनेरा पोलीस ठाण्याच्या हद्दीत कारवाई करत तीनही आरोपींना ताब्यात घेण्यात आले.
ताब्यात घेतलेले आरोपी
पोलिसांनी ताब्यात घेतलेल्या आरोपींची नावे पुढीलप्रमाणे आहेत—
- पलाश जगदीश कैतवास
- मयूर जगदीश कैतवास
- शिवम मिथिलेश कैतवास
तिन्ही आरोपी बडनेरा, अमरावती येथील रहिवासी असल्याची माहिती पोलिसांनी दिली आहे. तिन्ही आरोपी गंभीर गुन्ह्यांतील अटक वॉरंटमध्ये वांटेड असल्याचे पोलिसांकडून सांगण्यात आले.
तडीपार आरोपी हद्दीत आढळला
दरम्यान, आरोपी पलाश जगदीश कैतवास याला यापूर्वी अमरावती शहर पोलीस आयुक्तांनी अमरावती पोलीस आयुक्तालयाच्या हद्दीतून तडीपार केले होते. मात्र तो पुन्हा पोलीस हद्दीत वास्तव्यास आढळून आल्याने त्याच्याविरुद्ध महाराष्ट्र पोलीस कायद्याच्या कलम १४२ अन्वये स्वतंत्र कारवाई करण्यात आल्याची माहिती पोलिसांनी दिली.
तिन्ही आरोपींना पुढील कायदेशीर कारवाईसाठी बडनेरा पोलीस ठाण्याच्या ताब्यात देण्यात आले आहे.
वरिष्ठ अधिकाऱ्यांच्या मार्गदर्शनाखाली कारवाई
ही कारवाई पोलीस आयुक्त राकेश ओला आणि पोलीस उपायुक्त परिमंडळ-१ यशवंत साळुंखे यांच्या मार्गदर्शनाखाली करण्यात आली.
अँटी गुंडा पथकातील पोलीस उपनिरीक्षक मिलिंद हिवरे, पोलीस हवालदार सुभाष पाटील, पोलीस हवालदार सतीश देशमुख आणि वाहनचालक पोलीस हवालदार चंद्रकांत जनबंधू यांनी या कारवाईत सहभाग घेतला.
तसेच बडनेरा पोलीस ठाण्याचे वरिष्ठ पोलीस निरीक्षक उरलागोंडवार, पोलीस हवालदार सचिन श्रीवास, धनराज ठाकूर, उमेश गिलोरकर आणि सौरभ खुळे यांनी कारवाईत सहकार्य केले.
दरम्यान, ताब्यात घेतलेल्या आरोपींविरुद्ध पुढील कायदेशीर प्रक्रिया सुरू असून, या प्रकरणाचा पुढील तपास बडनेरा पोलीस करीत आहेत.
