भरदिवसा घरफोडी करणाऱ्या सराईत चोरट्याला पाचपावली पोलिसांच्या बेड्या

७३ हजार ८०० रुपयांचा मुद्देमाल लंपास; सीसीटीव्हीच्या मदतीने आरोपी जेरबंद, एक लाखांचा मुद्देमाल जप्त

नागपूर | प्रतिनिधी

नागपुरात भरदिवसा घरफोडी करून ७३ हजार ८०० रुपयांचा मुद्देमाल लंपास करणाऱ्या सराईत चोरट्याला पाचपावली पोलिसांनी बेड्या ठोकल्या आहेत. सीसीटीव्ही फुटेजच्या मदतीने आरोपीचा शोध घेत पोलिसांनी त्याला ताब्यात घेतले. आरोपीकडून चोरीच्या दागिन्यांसह घरफोडीसाठी वापरलेले साहित्य आणि इतर वस्तू असा सुमारे एक लाख रुपयांचा मुद्देमाल जप्त करण्यात आला आहे.

पाचपावली पोलीस ठाण्याच्या हद्दीतील हनुमान सोसायटी परिसरात ही घरफोडीची घटना घडली. मिळालेल्या माहितीनुसार, २ सप्टेंबर रोजी दुपारी संबंधित महिला घराला कुलूप लावून बाहेर गेल्या होत्या. हीच संधी साधत अज्ञात चोरट्याने घराचे लॉक तोडून आत प्रवेश केला.

घरात प्रवेश केल्यानंतर चोरट्याने बेडरूममधील दिवाण आणि अलमारीचे लॉकर फोडले. त्यातून ५८ हजार ८०० रुपयांचे सोने-चांदीचे दागिने आणि १५ हजार रुपयांची रोकड, असा एकूण ७३ हजार ८०० रुपयांचा मुद्देमाल चोरून नेण्यात आला.

सीसीटीव्हीच्या आधारे आरोपीचा शोध

घटनेची माहिती मिळताच पाचपावली पोलिसांनी तपास सुरू केला. परिसरातील सीसीटीव्ही कॅमेऱ्यांचे फुटेज तपासण्यात आले. फुटेजच्या आधारे पोलिसांना संशयित आरोपीची ओळख पटवण्यात यश आले.

यानंतर पोलिसांनी आरोपीचा शोध घेतला असता तो पोलिसांच्या हाती लागला. पोलिसांना पाहताच आरोपीने होंडा ॲक्टिव्हा सोडून पळून जाण्याचा प्रयत्न केला. मात्र पोलिसांनी त्याचा पाठलाग करून त्याला ताब्यात घेत अटक केली.

एक लाखांचा मुद्देमाल जप्त

अटक करण्यात आलेल्या आरोपीकडून पोलिसांनी चोरीचे सोने-चांदीचे दागिने, घरफोडीसाठी वापरण्यात आलेली लोखंडी कटावणी, तसेच संगणक साहित्य, पितळी स्क्रॅप आणि कास्याची मूर्ती असा सुमारे एक लाख रुपयांचा मुद्देमाल जप्त केला आहे.

चौकशीदरम्यान आरोपीने इतर काही गुन्ह्यांचीही कबुली दिल्याची माहिती पोलिसांकडून देण्यात आली आहे. या गुन्ह्यांमध्ये त्याचा आणखी कोणी साथीदार सहभागी आहे का, याचा तपास सुरू असून संबंधित साथीदाराचा शोध घेतला जात आहे.

आरोपीवर गंभीर गुन्ह्यांची नोंद

पोलिसांच्या माहितीनुसार, अटक करण्यात आलेला आरोपी सराईत गुन्हेगार असून त्याच्यावर यापूर्वीही गंभीर स्वरूपाचे गुन्हे दाखल आहेत. त्यामध्ये खून, अपहरण, वाहन चोरी आणि जबरी चोरी यांसारख्या गुन्ह्यांचा समावेश असल्याचे पोलिसांनी सांगितले.

भरदिवसा घर बंद असल्याची संधी साधून घरफोडी करणाऱ्या आरोपीला सीसीटीव्हीच्या आधारे जेरबंद करण्यात पाचपावली पोलिसांना यश आले आहे. सध्या आरोपी पोलीस कोठडीत असून त्याच्याकडून आणखी गुन्ह्यांची माहिती मिळते का, तसेच त्याच्या साथीदारांचा सहभाग किती आहे, याचा तपास पाचपावली पोलीस करत आहेत.