ट्रॅफिकमध्ये अडकले अन् आमदार रवी राणा थेट ऑटोमध्ये बसले!
राजकमल चौकातील गोगाबाबा नवमीच्या कार्यक्रमानंतर अनोखा प्रसंग; ऑटोचालकाशी संवाद साधत जाणून घेतल्या समस्या
अमरावती | बडनेरा
राजकमल चौकात गोगाबाबा नवमीच्या कार्यक्रमासाठी झालेल्या मोठ्या गर्दीमुळे वाहतूक कोंडी निर्माण झाली आणि याचवेळी बडनेरा मतदारसंघाचे आमदार रवी राणा यांनी घेतलेला एक निर्णय सध्या चर्चेचा विषय ठरत आहे. ट्रॅफिकमध्ये अडकून राहण्याऐवजी आमदार रवी राणा चक्क आपल्या वाहनातून खाली उतरले आणि थेट ऑटोमध्ये जाऊन बसले. विशेष म्हणजे, ऑटोमधून प्रवास करत असतानाच त्यांनी ऑटोचालकाशी संवाद साधत त्याच्या समस्या जाणून घेतल्या.
बडनेरा मतदारसंघातील विविध ठिकाणी भेटी दिल्यानंतर आमदार रवी राणा यांनी राजकमल चौकातील गोगाबाबा नवमीच्या कार्यक्रमाला भेट देऊन दर्शन घेतले. कार्यक्रम आटोपल्यानंतर ते परतीच्या मार्गावर निघाले. मात्र राजकमल चौक परिसरात मोठ्या प्रमाणात वाहतूक कोंडी झाल्याचे त्यांच्या निदर्शनास आले.
वाहतूक कोंडीमुळे वेळ वाया जाऊ नये म्हणून आमदार रवी राणा यांनी तात्काळ आपल्या वाहनातून खाली उतरण्याचा निर्णय घेतला. त्यानंतर ते थेट एका ऑटोमध्ये जाऊन बसले आणि ऑटोचालकाला पुढे जाण्यास सांगितले. त्यांच्यासोबत असलेले सुरक्षा रक्षकदेखील ऑटोमध्ये बसले.
विशेष म्हणजे, हा प्रवास केवळ वाहतूक कोंडी टाळण्यासाठी नव्हता. ऑटोमधून प्रवास करत असताना आमदार रवी राणा यांनी ऑटोचालकाशी संवाद साधला. शहरात ऑटो चालवताना येणाऱ्या अडचणी, वाहतुकीच्या समस्या आणि ऑटोचालकांच्या परिस्थितीबाबत त्यांनी माहिती घेतली.
यावेळी त्यांनी ऑटोचालकाच्या कुटुंबाचीही विचारपूस केली. अचानक आमदार स्वतः ऑटोमध्ये बसल्याने ऑटोचालकासाठीही हा प्रसंग विशेष ठरला.
सलग चौथ्यांदा बडनेरा मतदारसंघातून निवडून आलेले आमदार रवी राणा यांचा सामान्य नागरिकांशी थेट संवाद या प्रसंगातून पुन्हा एकदा पाहायला मिळाला. राजकमल चौकातील वाहतूक कोंडीमुळे निर्माण झालेल्या परिस्थितीत त्यांनी घेतलेला हा निर्णय नागरिकांचे लक्ष वेधून घेत आहे.
आमदार रवी राणा स्वतः ऑटोमधून प्रवास करत असल्याचे दृश्य पाहून बडनेरा मार्गावरील अनेक नागरिक आश्चर्यचकित झाले. राजकीय पदावरील व्यक्तीने वाहन बाजूला ठेवून सामान्य नागरिकाच्या वाहनातून प्रवास करत त्याच्या अडचणी जाणून घेतल्याचा हा प्रसंग सध्या शहरात चर्चेचा विषय ठरत आहे.
वाहतूक कोंडीचा प्रश्न, सामान्य ऑटोचालकाशी थेट संवाद आणि अचानक ऑटोमधून केलेला प्रवास, यामुळे आमदार रवी राणा यांच्या या कृतीची अमरावतीत चांगलीच चर्चा रंगली आहे.
