कामाचे पूर्णत्व प्रमाणपत्र नसतानाही निधी खर्च? कामरगाव ग्रामपंचायतीत ९९ हजारांचा गैरव्यवहार उघड

चौकशी अहवालात ९९ हजार ७३४ रुपयांच्या आर्थिक अनियमिततेचा उल्लेख; तत्कालीन सरपंच आणि ग्रामसेवकांच्या भूमिकेवर प्रश्नचिन्ह

कामरगाव, वाशिम | सिटी न्यूज

वाशिम जिल्ह्यातील कामरगाव ग्रामपंचायतीत सन २०२३-२०२४ या आर्थिक वर्षात सामान्य निधीच्या वापराबाबत ९९ हजार ७३४ रुपयांच्या आर्थिक अनियमिततेचा प्रकार चौकशीत समोर आल्याचा दावा करण्यात आला आहे. कामे पूर्ण झाल्याचे प्रमाणपत्र नसतानाही निधी खर्च केल्यासह रॉयल्टी कपात आणि दंडाच्या रकमेच्या भरण्याबाबत आक्षेप नोंदविण्यात आल्याची माहिती आहे.

तक्रारदार पंकज गणपतराव गांजरे यांनी केलेल्या पाठपुराव्यानंतर कारंजा पंचायत समितीचे विस्तार अधिकारी संजय अ. भगत यांनी या प्रकरणाची चौकशी केली. या चौकशी अहवालाला गटविकास अधिकारी पूनम राणे यांनीही सहमती दर्शविल्याचे सांगण्यात येत आहे.

पूर्णत्व प्रमाणपत्राशिवाय निधी खर्च केल्याचा आरोप

मिळालेल्या माहितीनुसार, रापटे बांधकाम, मिरवणूक रस्ता, आठवडी बाजारातील ओटा आणि इंदिरा नगर येथील सिमेंट रस्ता या कामांसंदर्भात काम पूर्णत्वाचे प्रमाणपत्र उपलब्ध नसतानाही निधी खर्च करण्यात आल्याचा आक्षेप चौकशीत नोंदविण्यात आला आहे.

या प्रकरणात तत्कालीन सरपंच साहेबराव तुमसरे आणि ग्रामसेवक अमोल बी. पाटील यांच्या कार्यकाळातील आर्थिक व्यवहारांची तपासणी करण्यात आल्याचे सांगण्यात येते.

रॉयल्टी कपात आणि दंडाच्या भरण्यावरही आक्षेप

या प्रकरणातील आणखी एका मुद्द्यानुसार, कंत्राटदाराकडून ४४ हजार २३४ रुपयांची रॉयल्टी कपात करण्यात आली नसल्याचा आक्षेप आहे. तसेच गौणखनिज उत्खननासंदर्भात तहसील कार्यालयाने ठोठावलेला ५५ हजार ५०० रुपयांचा दंड ग्रामपंचायतीच्या निधीतून भरल्याचा मुद्दाही चौकशीत उपस्थित करण्यात आल्याची माहिती आहे.

या आर्थिक व्यवहारांबाबत जबाबदारी निश्चित करून नियमानुसार पुढील कारवाई करण्याची मागणी होत आहे.

दोषींवर कारवाई कधी होणार?

चौकशी अहवालात आर्थिक अनियमिततेबाबत आक्षेप नोंदविण्यात आल्याचे सांगितले जात असले, तरी संबंधितांवर कोणती कारवाई करण्यात आली आहे, याबाबत अधिकृत माहिती स्पष्ट झालेली नाही. त्यामुळे अहवालानंतर प्रशासन पुढे काय पावले उचलणार, याकडे ग्रामस्थांचे लक्ष लागले आहे.

या प्रकरणातील आरोपांची स्वतंत्र पडताळणी आणि संबंधितांची बाजू समोर येणे महत्त्वाचे आहे. चौकशीतील निष्कर्षांच्या आधारे दोष निश्चित करून नियमानुसार कारवाई होणार का, हा प्रश्न उपस्थित होत आहे.

पाणी जपून वापरण्याचे प्रशासनाचे आवाहन

दरम्यान, परिसरात कोरड्या दुष्काळाचे सावट आणि पाणीटंचाईची शक्यता लक्षात घेता नागरिकांनी पाण्याचा अपव्यय टाळावा व उपलब्ध पाणी जपून वापरावे, असे आवाहन गटविकास अधिकारी पूनम राणे यांनी केल्याची माहिती आहे.

सिटी न्यूज | कामरगाव, वाशिम