अमरावतीत घरगुती गॅसचा तुटवडा; दुसरीकडे रस्त्यावरच सिलेंडरची खुलेआम विक्री?

सिटी न्यूजच्या कॅमेऱ्यात धक्कादायक प्रकार कैद; गॅस एजन्सीच्या वाहनातून ऑटोचालकाला सिलेंडर, रोख व्यवहाराचाही दावा

अमरावती : अमरावती शहरात घरगुती गॅस सिलेंडरसाठी नागरिकांना प्रतीक्षा करावी लागत असल्याच्या तक्रारी समोर येत असतानाच, दुसरीकडे घरगुती वापराच्या गॅस सिलेंडरचा रस्त्यावरच व्यवहार होत असल्याचा धक्कादायक प्रकार सिटी न्यूजच्या कॅमेऱ्यात कैद झाला आहे.

गॅससाठी नंबर लावल्यानंतरही ग्राहकांना सिलेंडरसाठी प्रतीक्षा करावी लागत आहे. वाढती महागाई आणि गॅसच्या उपलब्धतेचा प्रश्न असताना, घरगुती वापराचा सिलेंडर रस्त्यावरच रोख रक्कम घेऊन दिला जात असल्याचे दृश्य समोर आले आहे.

विशेष म्हणजे, इरविनकडून राजापेठच्या दिशेने जाणाऱ्या उड्डाणपुलावर हा प्रकार कॅमेऱ्यात कैद झाला. दृश्यांमध्ये विदर्भ गॅस एजन्सीचे इंडियन गॅस वाहन दिसत असून, त्याचा क्रमांक MH 27 DZ 0412 असा आहे.

या वाहनातून एका ऑटोचालकाला घरगुती गॅस सिलेंडर देण्यात आल्याचे कॅमेऱ्यात दिसत आहे. संबंधित ऑटोचा क्रमांक MH 27 BW 9496 असा आहे. या व्यवहारादरम्यान रोख रकमेची देवाणघेवाण होत असल्याचेही दृश्यात दिसत असल्याचा दावा करण्यात आला आहे.

मात्र, घरगुती वापरासाठी असलेल्या गॅस सिलेंडरचा अशा प्रकारे रस्त्यावर व्यवहार करणे नियमांच्या चौकटीत आहे का? हा आता महत्त्वाचा प्रश्न उपस्थित झाला आहे.

जर घरगुती सिलेंडरचा अनधिकृत पद्धतीने पुरवठा किंवा विक्री होत असेल, तर त्याचा थेट परिणाम नियमित ग्राहकांवर होण्याची शक्यता आहे. आधीच सिलेंडरसाठी प्रतीक्षा करणाऱ्या नागरिकांना अशा प्रकारामुळे आणखी अडचणींचा सामना करावा लागू शकतो.

त्यामुळे हा एकच प्रकार आहे की अमरावती शहरातील इतर भागातही अशाच पद्धतीने घरगुती सिलेंडरचा व्यवहार सुरू आहे, याची संबंधित विभागाकडून तपासणी होणे गरजेचे आहे.

तसेच सिटी न्यूजच्या कॅमेऱ्यात कैद झालेल्या या प्रकाराबाबत संबंधित गॅस एजन्सीची भूमिका काय आहे, हेही स्पष्ट होणे आवश्यक आहे. वाहन क्रमांक, वितरणाची नोंद, संबंधित ग्राहक आणि कथित रोख व्यवहार यांची चौकशी केल्यास या प्रकारामागचे वास्तव समोर येऊ शकते.

आता जिल्हाधिकाऱ्यांच्या अधिकार क्षेत्रातील संबंधित गॅस वितरण आणि पुरवठा विभाग या प्रकरणाची स्वतःहून दखल घेतो का, वाहनाची तपासणी करतो का आणि नियमांचे उल्लंघन आढळल्यास संबंधितांवर कारवाई करतो का, याकडे अमरावतीकरांचे लक्ष लागले आहे.

कारण घरगुती गॅस हा सर्वसामान्य नागरिकांच्या दैनंदिन जीवनातील अत्यावश्यक विषय आहे. त्यामुळे त्याच्या वितरण व्यवस्थेत पारदर्शकता, उपलब्धता आणि नियमांचे काटेकोर पालन होणे ही नागरिकांची अपेक्षा आहे.

एकीकडे नागरिकांना गॅस सिलेंडरसाठी प्रतीक्षा करावी लागत असताना, दुसरीकडे रस्त्यावरच सिलेंडरचा व्यवहार होत असल्याचे दृश्य समोर आल्याने प्रशासनासमोर अनेक प्रश्न निर्माण झाले आहेत.

तक्रार येण्याची वाट पाहिली जाणार की प्रशासन स्वतःहून या प्रकाराची दखल घेणार? वाहन आणि वितरणाची नोंद तपासली जाणार का? नियमांचे उल्लंघन आढळल्यास कारवाई होणार का? या सर्व प्रश्नांची उत्तरे आता प्रशासनाच्या चौकशीतून स्पष्ट होणार आहेत.

अमरावतीकरांना घरगुती गॅसचा नियमित, सुरक्षित आणि पारदर्शक पुरवठा मिळावा, एवढीच अपेक्षा. सिटी न्यूज या प्रकरणात प्रशासनाची भूमिका आणि पुढील कारवाईचा पाठपुरावा करत राहणार आहे.