‘सेफ फूड, सेफ महाराष्ट्र’ मोहिमेत बीडमध्ये FDA ची मोठी कारवाई; 1.19 लाख किलो खाद्यतेल जप्त
1.94 कोटींच्या खाद्यतेलावर कारवाई; पाच आस्थापनांचे परवाने निलंबित करून व्यवसाय बंद
बीड: ‘सेफ फूड, सेफ महाराष्ट्र’ या मोहिमेंतर्गत महाराष्ट्र अन्न व औषध प्रशासनाने बीड जिल्ह्यात मोठी कारवाई केली आहे. 6 आणि 7 ऑगस्ट रोजी करण्यात आलेल्या छापेमारीत तब्बल 1,19,187.5 किलो खाद्यतेल जप्त करण्यात आले आहे. जप्त करण्यात आलेल्या तेलाची एकूण किंमत सुमारे 1 कोटी 94 लाख रुपये आहे.
अन्न व औषध प्रशासनाच्या पथकाने जिल्ह्यातील विविध आस्थापनांची तपासणी केली. यावेळी अस्वच्छ परिस्थितीत खाद्यपदार्थांची हाताळणी, चुकीचे किंवा दिशाभूल करणारे लेबलिंग, वापरलेले डबे पुन्हा वापरणे आणि आवश्यक नोंदी उपलब्ध नसणे, अशा अनेक गंभीर त्रुटी आढळून आल्या.
या नियमभंगामुळे पाच आस्थापनांचे अन्न परवाने निलंबित करण्यात आले असून, संबंधित आस्थापने बंद करण्याची कारवाई करण्यात आली आहे.
मोठ्या प्रमाणात खाद्यतेल जप्त केल्याने खाद्यपदार्थांच्या गुणवत्तेबाबत प्रशासन किती सतर्क आहे, हे या कारवाईतून स्पष्ट झाले आहे. नागरिकांना सुरक्षित आणि दर्जेदार अन्नपदार्थ उपलब्ध करून देण्यासाठी अशा प्रकारच्या कारवाया पुढेही सुरू राहणार असल्याचे प्रशासनाकडून स्पष्ट करण्यात आले आहे.
