नागपूरमध्ये मंदिरातील दानपेटी फोडणारा सराईत चोर जेरबंद; सीसीटीव्ही फोडूनही पोलिसांच्या तावडीत

लकडगंज पोलिसांची कौशल्यपूर्ण कारवाई; तांत्रिक तपासातून आरोपीला अटक, चोरीचा मुद्देमाल जप्त

नागपूर | प्रतिनिधी

नागपूर शहरातील लकडगंज पोलीस ठाण्याच्या हद्दीतील दोन मंदिरांमध्ये दानपेटी फोडून चोरी करणाऱ्या सराईत चोराला लकडगंज पोलिसांनी अटक केली आहे. चोरीनंतर आरोपीने मंदिरातील सीसीटीव्ही यंत्रणा फोडून पुरावे नष्ट करण्याचाही प्रयत्न केला होता. मात्र, तांत्रिक तपास, सीसीटीव्ही विश्लेषण आणि गोपनीय माहितीच्या आधारे पोलिसांनी आरोपीला अवघ्या काही दिवसांत जेरबंद केले.

माहितीनुसार, माला धक्का रोड परिसरातील शीतला माता मंदिर आणि शिव मंदिरात मध्यरात्री अज्ञात चोरट्याने प्रवेश करून मुख्य दरवाज्यांची कुलपे तोडली. त्यानंतर दोन्ही मंदिरांतील दानपेट्यांची कुलपे फोडून सुमारे सात हजार रुपयांची दानरक्कम चोरून नेली.

गुन्हा केल्यानंतर आरोपीने मंदिरातील सीसीटीव्ही यंत्रणेचे नुकसान करून पुरावे नष्ट करण्याचाही प्रयत्न केला. या घटनेनंतर मंदिराचे विश्वस्त जितेंद्रकुमार पांडे यांनी लकडगंज पोलीस ठाण्यात तक्रार दाखल केली.

प्रकरणाचे गांभीर्य लक्षात घेऊन लकडगंज पोलिसांनी तांत्रिक तपास सुरू केला. परिसरातील सीसीटीव्ही फुटेजचे बारकाईने विश्लेषण करण्यात आले तसेच स्थानिक माहितीदारांचे जाळे सक्रिय करण्यात आले.

तपासादरम्यान मिळालेल्या गोपनीय माहितीच्या आधारे पोलिसांनी जरीपटका परिसरातून वंश महादेव मेश्राम (वय २० वर्षे) याला ताब्यात घेतले. चौकशीदरम्यान आरोपीने गुन्ह्याची कबुली दिली असून त्याच्या ताब्यातून चोरीस गेलेला मुद्देमालही जप्त करण्यात आला आहे.

ही कारवाई पोलीस आयुक्तांच्या मार्गदर्शनाखाली वरिष्ठ पोलीस निरीक्षक मुकुंद कवाडे यांच्या नेतृत्वाखालील पथकाने यशस्वीरीत्या पार पाडली.

लकडगंज पोलिसांच्या जलद आणि कौशल्यपूर्ण तपासामुळे मंदिरातील चोरीचा गंभीर गुन्हा अल्पावधीत उघडकीस आला असून, त्यामुळे नागरिकांमध्ये पोलिसांबद्दल विश्वास अधिक दृढ झाला आहे. या प्रकरणाचा पुढील तपास सुरू असून आरोपीच्या इतर गुन्हेगारी पार्श्वभूमीचीही चौकशी केली जात आहे.