ब्लिंकिट डिलिव्हरी बॉयवर जीवघेणा हल्ला; दोन सहकारी अटकेत
गणेशपेठ पोलिसांकडून हाफ मर्डरचा गुन्हा दाखल; हल्ल्यातील शस्त्र आणि आरोपींचे कपडे जप्त
नागपूर | प्रतिनिधी
नागपूर शहरातील गणेशपेठ पोलीस ठाण्याच्या हद्दीत ब्लिंकिटच्या एका डिलिव्हरी बॉयवर जीवघेणा हल्ला झाल्याची घटना समोर आली आहे. काम आटोपून घरी जात असताना त्याच कंपनीत काम करणाऱ्या दोन सहकाऱ्यांनी त्याच्यावर हल्ला केल्याचा आरोप असून, पोलिसांनी तातडीने कारवाई करत दोन्ही आरोपींना अटक केली आहे.
पोलिसांनी दिलेल्या माहितीनुसार, फिर्यादी अमीन मुस्तफा पठाण हा काम संपवून घरी जात असताना त्याच कंपनीत कार्यरत असलेल्या दोन सहकाऱ्यांनी त्याच्यावर हल्ला केला. हल्ल्यात तो गंभीर जखमी झाला असून, या प्रकरणाची माहिती मिळताच गणेशपेठ पोलिसांनी घटनास्थळी धाव घेत तपास सुरू केला.
तपासादरम्यान पोलिसांनी केतन उरकुडे आणि श्रावण बराई या दोन्ही संशयित आरोपींना अटक केली. आरोपींकडून हल्ल्यात वापरण्यात आलेले शस्त्र तसेच गुन्ह्यावेळी अंगावर असलेले कपडे जप्त करण्यात आले आहेत.
या प्रकरणी पोलिसांनी भारतीय न्याय संहितेच्या संबंधित तरतुदींनुसार जीवे मारण्याच्या प्रयत्नाचा (हाफ मर्डर) गुन्हा नोंदवला असून, हल्ल्यामागील नेमके कारण काय होते, याचा सखोल तपास सुरू आहे.
दरम्यान, हा हल्ला नेमका कोणत्या कारणातून झाला, आरोपी आणि फिर्यादी यांच्यात यापूर्वी काही वाद होता का, तसेच इतर कोणाचा सहभाग आहे का, याचाही तपास गणेशपेठ पोलीस करीत आहेत.
