पेंच व्याघ्र प्रकल्पातील T-98 नर वाघाचा मृत्यू; कारण अस्पष्ट, तपास सुरू
रामटेक वनपरिक्षेत्रातील खुमारी नियतक्षेत्रात मृतावस्थेत आढळला; शवविच्छेदन अहवालानंतरच मृत्यूचे कारण स्पष्ट होणार
रामटेक | प्रतिनिधी
नागपूर जिल्ह्यातील रामटेक वनपरिक्षेत्रातून एक धक्कादायक घटना समोर आली आहे. पेंच व्याघ्र प्रकल्पातील T-98 या नर वाघाचा मृत्यू झाला असून तो रामटेक वनपरिक्षेत्रातील मनसर उपवनक्षेत्राच्या खुमारी नियतक्षेत्रात मृतावस्थेत आढळून आला. वन विभागाने या प्रकरणाचा तपास सुरू केला असून शवविच्छेदन अहवालानंतरच मृत्यूचे नेमके कारण स्पष्ट होणार आहे.
वन विभागाच्या माहितीनुसार, १३ जुलै रोजी T-98 हा वाघ अशक्त अवस्थेत आढळला होता. त्यानंतर चोरबाहुली आणि रामटेक वनपरिक्षेत्रातील अधिकारी व कर्मचाऱ्यांनी त्याच्या हालचालींवर सातत्याने लक्ष ठेवले होते.
आज सकाळपासूनही वन विभागाचे पथक वाघाच्या हालचालींवर नजर ठेवून होते. मात्र दुपारी सुमारे १२.३० वाजण्याच्या सुमारास कोणतीही हालचाल दिसून न आल्याने अधिकारी घटनास्थळी पोहोचले. पाहणीदरम्यान वाघाचा मृत्यू झाल्याचे स्पष्ट झाले.
घटनास्थळी पेंच व्याघ्र प्रकल्पाचे सहाय्यक वनसंरक्षक, वनपरिक्षेत्र अधिकारी, पशुवैद्यकीय अधिकारी तसेच रामटेक वनपरिक्षेत्रातील अधिकारी उपस्थित होते. त्यांच्या उपस्थितीत पंचनामा करण्यात आला आणि आवश्यक नमुने संकलित करण्यात आले.
त्यानंतर वाघाचा मृतदेह पुढील तपासणी आणि शवविच्छेदनासाठी नागपूर येथील टीटीसी सेंटर येथे हलविण्यात आला. उपवनसंरक्षक डॉ. विनीता व्यास यांच्या उपस्थितीत राष्ट्रीय व्याघ्र संवर्धन प्राधिकरण (NTCA) च्या मार्गदर्शक तत्त्वांनुसार सर्व आवश्यक प्रक्रिया पूर्ण करण्यात आली.
दरम्यान, T-98 च्या मृत्यूमागील नेमके कारण अद्याप स्पष्ट झालेले नाही. हा मृत्यू नैसर्गिक कारणांमुळे झाला की त्यामागे अन्य काही कारण आहे, याबाबत वन विभाग सर्व शक्यता तपासत आहे. शवविच्छेदन अहवाल आणि तपास पूर्ण झाल्यानंतरच याबाबत अधिकृत माहिती समोर येणार आहे.
पेंच व्याघ्र प्रकल्पातील या नर वाघाच्या मृत्यूमुळे वन्यजीव संवर्धन क्षेत्रात चिंता व्यक्त केली जात असून, या प्रकरणाच्या तपासाकडे वन विभागासह वन्यजीव अभ्यासकांचे लक्ष लागले आहे.
