नागपुरात ऑनलाइन लॉटरी-सट्टेबाजीवर पोलिसांचा धाडसी छापा; लाखोंचा मुद्देमाल जप्त, दोन आरोपी ताब्यात
नागपूर शहरात अवैध ऑनलाइन लॉटरी आणि सट्टेबाजीविरोधात गुन्हे शाखेच्या युनिट तीनने मोठी कारवाई करत लालगंज परिसरातील एका अड्ड्यावर छापा टाकला. या कारवाईत लाखो रुपयांचा मुद्देमाल जप्त करण्यात आला असून दोन आरोपींना ताब्यात घेण्यात आले आहे. तर या प्रकरणातील एक आरोपी अद्याप फरार असून त्याचा शोध सुरू आहे.
मिळालेल्या माहितीनुसार, गुन्हे शाखेच्या युनिट तीनला शांतीनगर पोलीस ठाण्याच्या हद्दीतील लालगंज परिसरात शासनबंदीत असलेली ऑनलाइन लॉटरी आणि सट्टेबाजी सुरू असल्याची गुप्त माहिती मिळाली होती. या माहितीच्या आधारे पोलिसांनी चकना चौक परिसरात नियोजनबद्ध छापा टाकला.
छापेमारीदरम्यान काही व्यक्ती ऑनलाइन लॉटरी आणि सट्टेबाजीच्या माध्यमातून आर्थिक व्यवहार करत असल्याचे उघड झाले. पोलिसांनी घटनास्थळावरून दोन आरोपींना ताब्यात घेतले, तर एक आरोपी पसार होण्यात यशस्वी झाला.
या कारवाईत पोलिसांनी चार संगणक, चार सीपीयू, सात गेमिंग मशीन, दोन स्लिप मशीन, मोबाईल फोन, राऊटर तसेच इतर तांत्रिक साहित्य जप्त केले. याशिवाय रोख रक्कमही हस्तगत करण्यात आली आहे. जप्त करण्यात आलेल्या मुद्देमालाची एकूण किंमत सुमारे 2 लाख 93 हजार 740 रुपये असल्याची माहिती पोलिसांनी दिली.
या प्रकरणी शांतीनगर पोलीस ठाण्यात महाराष्ट्र जुगार प्रतिबंधक कायद्याच्या संबंधित कलमान्वये गुन्हा दाखल करण्यात आला आहे. गुन्हे शाखेच्या अधिकाऱ्यांनी आरोपींसह जप्त केलेला मुद्देमाल पुढील तपास आणि कायदेशीर कारवाईसाठी शांतीनगर पोलिसांच्या ताब्यात दिला आहे.
नागपूर पोलिसांनी अवैध ऑनलाइन सट्टेबाजी, लॉटरी आणि जुगार व्यवसायाविरोधात पुन्हा एकदा कठोर भूमिका घेतल्याचे या कारवाईतून स्पष्ट झाले आहे. अशा बेकायदेशीर व्यवसायांवर यापुढेही सातत्याने कारवाई करण्यात येईल, असा इशाराही पोलिसांकडून देण्यात आला आहे.
शहरात वाढत्या ऑनलाइन जुगार आणि सट्टेबाजीच्या प्रकारांमुळे युवकांची आर्थिक फसवणूक आणि गुन्हेगारीला खतपाणी मिळत असल्याची चिंता व्यक्त केली जात असताना, गुन्हे शाखेच्या या कारवाईचे नागरिकांकडून स्वागत केले जात आहे. आता या रॅकेटमागील इतर आरोपी आणि आर्थिक व्यवहारांची साखळी उघड करण्यासाठी पोलिसांकडून सखोल तपास सुरू आहे.
