परभणीत भरधाव टिप्परची दुचाकीला धडक; २९ वर्षीय तरुणाचा जागीच मृत्यू, वडील गंभीर जखमी
परभणी जिल्ह्यातील पूर्णा शहरातील ताडकळस टी-पॉइंटवर एका भरधाव टिप्परने दुचाकीला जोरदार धडक दिली. या भीषण अपघातात २९ वर्षीय तरुणाचा जागीच दुर्दैवी मृत्यू झाला, तर त्याचे वडील गंभीर जखमी झाले आहेत.
मोहम्मद सिद्दीकी जिलानी असे अपघातात जीव गमावलेल्या तरुणाचे नाव आहे. अपघातानंतर गंभीर जखमी झालेल्या वडिलांना तातडीने उपचारासाठी जवळच्या रुग्णालयात दाखल करण्यात आले आहे.
मिळालेल्या प्राथमिक माहितीनुसार, टिप्पर भरधाव वेगात असल्याने चालकाचे वाहनावरील नियंत्रण सुटले आणि दुचाकीला जोरदार धडक बसली. धडक इतकी भीषण होती की मोहम्मद सिद्दीकी जिलानी यांचा जागीच मृत्यू झाला.
घटनेनंतर परिसरात मोठी गर्दी झाली होती. स्थानिक नागरिकांनी तात्काळ मदतकार्य करत जखमींना रुग्णालयात हलवले तसेच पोलिसांना माहिती दिली.
या हृदयद्रावक घटनेमुळे पूर्णा शहर आणि ताडकळस टी-पॉइंट परिसरात मोठी हळहळ व्यक्त केली जात आहे. वाढत्या अपघातांमुळे स्थानिक नागरिकांमधून संताप व्यक्त होत असून या मार्गावरील वाहतुकीवर नियंत्रण ठेवण्याची मागणी जोर धरत आहे.
दरम्यान, पोलिसांनी घटनास्थळी धाव घेत पंचनामा केला असून अपघातप्रकरणी पुढील तपास सुरू आहे.
