महाबळेश्वर आंबेनळी घाटात भीषण दुर्घटना; 1500 फूट दरीत स्कॉर्पिओ कोसळून 8 मित्रांचा मृत्यू
महाबळेश्वर येथील आंबेनळी घाटात सोमवारी (२५ मे) पहाटेच्या सुमारास अत्यंत भीषण अपघात घडला. प्रवाशांनी भरलेली स्कॉर्पिओ गाडी तब्बल 1500 फूट खोल दरीत कोसळल्याने आठ जणांचा दुर्दैवी मृत्यू झाला. या घटनेमुळे संपूर्ण राज्यात हळहळ व्यक्त केली जात आहे.
मिळालेल्या माहितीनुसार, सोमवारी पहाटे सुमारे 3 वाजण्याच्या सुमारास स्थानिक प्रशासनाला अपघाताची माहिती मिळाली. त्यानंतर ‘सह्याद्री वन्यजीव रक्षणार्थ सामाजिक संस्था’, स्थानिक रेस्क्यू टीम, पोलीस तसेच आपत्ती व्यवस्थापन पथके तातडीने घटनास्थळी दाखल झाली. अंधार, खोल दरी आणि दुर्गम परिसरामुळे बचावकार्य करताना मोठ्या अडचणींचा सामना करावा लागत आहे.
रायगड जिल्हा आपत्ती व्यवस्थापन विभागाने दिलेल्या माहितीनुसार, अपघातग्रस्त स्कॉर्पिओचा क्रमांक MH 11 DN 2340 असा असून गाडीत एकूण आठ जण प्रवास करत होते. हे सर्वजण सातारा जिल्ह्यातील कोरेगाव तालुक्यातील आसगाव येथील रहिवासी होते. मृतांमध्ये महेश पवार, आदित्य साळुंखे, रितेश लोखंडे, सुहास लोखंडे, अंश चव्हाण, उत्कर्ष शिंगटे, अनिल शिंगटे आणि नितीन नायकोंडे यांचा समावेश आहे.
अपघात इतका भीषण होता की गाडी दरीत कोसळल्यानंतर मृतदेह वेगवेगळ्या ठिकाणी विखुरले गेले. प्रशासनाने प्रत्येकी सात सदस्यांची पाच बचाव पथके तयार करून युद्धपातळीवर मदतकार्य सुरू केले आहे. एनडीआरएफसह विविध स्वयंसेवी संस्थांचीही मदत घेतली जात आहे.
या दुर्घटनेबाबत मुख्यमंत्री Devendra Fadnavis यांनी दुःख व्यक्त करत मृतांना भावपूर्ण श्रद्धांजली अर्पण केली. “या आठ मित्रांची सहल अखेरची ठरली, ही अत्यंत वेदनादायी घटना आहे. मृतांच्या कुटुंबीयांच्या दुःखात राज्य सरकार सहभागी आहे,” असे त्यांनी म्हटले आहे.
दरम्यान, अपघात नेमका कशामुळे झाला याचा तपास सुरू असून वाहनाचा ताबा सुटल्याची प्राथमिक शक्यता व्यक्त करण्यात येत आहे. रायगड आणि सातारा पोलिस यंत्रणा समन्वयाने पुढील तपास करत आहेत.
