अमरावतीत माहेश्वरी महिला समाजाचा भव्य सन्मान व पदग्रहण सोहळा उत्साहात
अमरावतीमध्ये माहेश्वरी महिला समाजाचा भव्य सन्मान आणि पदग्रहण सोहळा उत्साहात पार पडला. जिल्हा माहेश्वरी महिला संगठनाच्या दशम सत्राचा समारोप आणि एकादश sत्राच्या शुभारंभानिमित्त आयोजित या कार्यक्रमात समाजातील महिलांचा उत्साह, एकजूट आणि नेतृत्वाची ताकद पाहायला मिळाली.
अमरावती येथील माहेश्वरी भवनात आयोजित करण्यात आलेल्या या सोहळ्याची सुरुवात भगवान महेश पूजन आणि महेश वंदनेने करण्यात आली. कार्यक्रमात समाजसेवेत उल्लेखनीय योगदान देणाऱ्या महिलांचा सन्मान करण्यात आला तसेच नव्या कार्यकारिणीचा पदग्रहण सोहळाही पार पडला.
या कार्यक्रमाला अखिल भारतीय संयुक्त मंत्री भारतीजी राठी आणि विदर्भ प्रादेशिक माहेश्वरी महिला संगठनाच्या अध्यक्षा नीलिमाजी मंत्री यांची प्रमुख उपस्थिती लाभली. यावेळी दशम सत्रातील पदाधिकाऱ्यांनी गेल्या कार्यकाळातील विविध सामाजिक उपक्रम आणि संघटनात्मक कामांचा आढावा सादर केला.
विशेष म्हणजे अमरावती शहरात प्रथमच तालुका गठनाची घोषणा करण्यात आली. या निर्णयामुळे संघटनात्मक विस्ताराला नवी दिशा मिळणार असल्याचे सांगण्यात आले. महिलांच्या सहभागातून समाजकार्य अधिक व्यापक करण्याचा निर्धार यावेळी व्यक्त करण्यात आला.
कार्यक्रमात समाजासाठी उल्लेखनीय कार्य करणाऱ्या महिला पदाधिकाऱ्यांचा विशेष सन्मान करण्यात आला. विविध क्षेत्रांत योगदान देणाऱ्या महिलांच्या कार्याची दखल घेत त्यांना गौरविण्यात आले.
त्यानंतर एकादश सत्रासाठी नवीन कार्यकारिणीची घोषणा करण्यात आली. नवनिर्वाचित अध्यक्षा किरण मूंधड़ा यांनी महिलांनी समाजकार्य, नेतृत्व आणि संघटन अधिक बळकट करण्यासाठी सक्रिय भूमिका बजावण्याचे आवाहन केले.
या सोहळ्याला अमरावती जिल्ह्यातील विविध तालुक्यांमधून महिला पदाधिकारी, सामाजिक कार्यकर्त्या आणि माहेश्वरी समाजातील मान्यवर मोठ्या संख्येने उपस्थित होते. कार्यक्रमादरम्यान महिलांच्या नेतृत्वाला प्रोत्साहन देणारे प्रेरणादायी मार्गदर्शनही करण्यात आले.
महिलांचे नेतृत्व, समाजसेवा आणि संघटन बळकट करण्याचा संदेश देणारा हा भव्य सोहळा अमरावतीत उत्साहपूर्ण वातावरणात पार पडला. नवीन कार्यकारिणीच्या माध्यमातून समाजहिताचे उपक्रम अधिक प्रभावीपणे राबवले जातील, असा विश्वास यावेळी व्यक्त करण्यात आला.
