अमरावतीत ‘प्रेमाच्या जाळ्यात’ अडकवून शेतकऱ्याकडून 69 लाखांची उकळपट्टी; पती-पत्नीविरुद्ध गुन्हा
अमरावती जिल्ह्यातून एक धक्कादायक ब्लॅकमेलिंग प्रकरण समोर आले आहे. मोबाईल रिचार्ज दुकानातून झालेल्या ओळखीचे रूपांतर विश्वासात झाले आणि त्यानंतर एका शेतकऱ्याला प्रेमाच्या जाळ्यात अडकवून तब्बल 69 लाख रुपये उकळल्याचा आरोप करण्यात आला आहे. या प्रकरणी नांदगाव पेठ पोलिसांनी एका पती-पत्नीविरुद्ध गुन्हा दाखल केला आहे.
मिळालेल्या माहितीनुसार, या प्रकरणाची सुरुवात अवघ्या 10 हजार रुपयांच्या उसनवारीपासून झाली. मोबाईल रिचार्ज दुकानात शेतकऱ्याची एका महिलेशी ओळख झाली. त्यानंतर महिलेनं शेतकऱ्याशी नियमित संपर्क वाढवत गोड बोलून विश्वास संपादन केला.
तक्रारीनुसार, विश्वासाचे नाते निर्माण झाल्यानंतर संबंधित महिलेनं शेतकऱ्याला भावनिकदृष्ट्या गुंतवले. पुढे बलात्काराच्या गुन्ह्यात अडकवण्याची धमकी देत मोठ्या प्रमाणात पैशांची मागणी करण्यात आली. भीतीपोटी शेतकऱ्याने वेळोवेळी लाखो रुपयांचे धनादेश दिल्याचा दावा करण्यात आला आहे.
पोलिसांकडे दिलेल्या तक्रारीनुसार, आरोपींकडून “तुमची जिंदगी बरबाद करून टाकू” अशा धमक्याही देण्यात आल्या. या दबावाखाली शेतकऱ्याकडून एकूण 69 लाख रुपये उकळण्यात आल्याचा आरोप आहे.
या प्रकरणाची गंभीर दखल घेत नांदगाव पेठ पोलिसांनी पती-पत्नीविरुद्ध गुन्हा दाखल केला असून आर्थिक व्यवहार, बँक नोंदी, मोबाईल कॉल रेकॉर्ड आणि इतर पुराव्यांची तपासणी सुरू केली आहे.
या घटनेमुळे परिसरात मोठी खळबळ उडाली आहे. भावनिक विश्वासाचा गैरफायदा घेत आर्थिक फसवणूक केल्याचा आरोप अत्यंत गंभीर मानला जात असून तपासातून आणखी धक्कादायक माहिती समोर येण्याची शक्यता आहे.
विश्वास, जवळीक आणि भावनिक नात्याचा आधार घेऊन फसवणूक करण्याच्या वाढत्या घटनांमुळे नागरिकांनी सावध राहणे गरजेचे आहे. या प्रकरणात पोलिस तपासातून नेमके सत्य काय समोर येते, याकडे आता सर्वांचे लक्ष लागले आहे.
