छत्तीसगडमध्ये ‘आदमखोर’ कुत्र्याचा धुमाकूळ; १२ जणांना चावा, गावात भीतीचं सावट
महासमुंद : छत्तीसगडच्या महासमुंद जिल्ह्यातील पिथौरा परिसरात एका भटक्या आक्रमक कुत्र्याने अक्षरशः दहशत माजवली आहे. या कुत्र्याच्या हल्ल्यामुळे जामपाली आणि जंघोरा गावांमध्ये भीतीचं वातावरण निर्माण झालं असून, गावातील रस्ते आणि गल्लीबोळ अक्षरशः ओस पडले आहेत.
माहितीनुसार, पिथौरा परिसरातील या भटक्या कुत्र्याने अचानक आक्रमक रूप धारण करत गावात फिरणाऱ्या नागरिकांवर हल्ले सुरू केले. या कुत्र्याने आतापर्यंत सुमारे १२ जणांना चावा घेत गंभीर जखमी केल्याची माहिती समोर आली आहे.
स्थानिकांच्या म्हणण्यानुसार, हा कुत्रा असामान्यपणे हिंसक झाला असून गावातील रस्त्यांवर फिरत अचानक नागरिकांवर झडप घालत आहे.
राहदारीतून जाणारे ग्रामस्थ, घराबाहेर उभे असलेले नागरिक आणि रस्त्याने चालणाऱ्यांवर तो थेट हल्ला करत असल्याने ग्रामस्थांमध्ये मोठी भीती निर्माण झाली आहे.
या सलग हल्ल्यांनंतर जामपाली आणि जंघोरा गावात दहशतीचं वातावरण निर्माण झालं आहे.
परिस्थिती इतकी गंभीर बनली आहे की, नागरिक घराबाहेर पडण्यास घाबरत असून गावातील रस्त्यांवर शुकशुकाट पसरला आहे.
जखमींना तातडीने स्थानिक रुग्णालयात दाखल करण्यात आले असून त्यांच्यावर उपचार सुरू आहेत. काहींना गंभीर दुखापत झाल्याची माहिती मिळत आहे.
या घटनेनंतर ग्रामस्थांनी प्रशासनाकडे तातडीने कारवाईची मागणी केली आहे.
आक्रमक कुत्र्याला त्वरित पकडून गावकऱ्यांना दिलासा द्यावा, अशी मागणी स्थानिकांनी केली आहे.
दरम्यान, या घटनेमुळे परिसरात भीतीचं सावट पसरलं असून नागरिकांनी लहान मुलांना घराबाहेर न सोडण्याचा निर्णय घेतला आहे.
गावात आता एकच प्रश्न विचारला जात आहे — हा आक्रमक कुत्रा नेमका कधी पकडला जाणार?
