अमरावतीत हातभट्टी दारू विक्रीवर पोलिसांचा छापा; 60 वर्षीय महिला रंगेहात पकडली
अमरावती शहरात अवैध हातभट्टी दारू विक्रीवर पोलिसांनी पुन्हा एकदा धडक कारवाई करत मोठा घाव घातला आहे. फ्रेजरपुरा पोलीस स्टेशन हद्दीत गुन्हे शाखेच्या पथकाने छापा टाकत 60 वर्षीय महिलेला रंगेहात पकडले.
मिळालेल्या माहितीनुसार, दिनांक 5 मे 2026 रोजी पेट्रोलिंगदरम्यान गुन्हे शाखेच्या पथकाला भुईपुरा, वडाळी परिसरात अवैध हातभट्टी दारू विक्री सुरू असल्याची गुप्त माहिती मिळाली होती. या माहितीच्या आधारे पोलिसांनी तात्काळ सापळा रचत संबंधित ठिकाणी छापा टाकला.
या कारवाईदरम्यान आरोपी कमलाबाई वामनराव चाचरकार (वय 60) या आपल्या घरासमोरील आवारात हातभट्टी दारूची विक्री करताना आढळून आल्या. पोलिसांनी त्यांना ताब्यात घेत त्यांच्या ताब्यातून 20 लिटर अवैध हातभट्टी दारू जप्त केली.
जप्त करण्यात आलेल्या मुद्देमालाची एकूण किंमत सुमारे 6 हजार रुपये असल्याचे पोलिसांनी सांगितले. या प्रकरणी फ्रेजरपुरा पोलीस ठाण्यात आरोपीविरुद्ध महाराष्ट्र दारूबंदी कायद्यानुसार गुन्हा दाखल करण्यात आला असून पुढील तपास सुरू आहे.
अमरावतीत अवैध दारू विक्रीविरोधात पोलिसांनी पुन्हा एकदा कडक भूमिका घेतल्याचे या कारवाईतून स्पष्ट झाले आहे. अशा धडक कारवायांमुळे शहरातील बेकायदेशीर हातभट्टी व्यवसायावर कितपत आळा बसतो, हे पाहणं आता महत्त्वाचं ठरणार आहे.
