गुजरातमधील सूरत शहरातून एक अत्यंत धक्कादायक घटना समोर आली आहे. भरतनगर परिसरात पहाटेच्या सुमारास एका इमारतीला लागलेल्या भीषण आगीमुळे आणि त्यानंतर झालेल्या गॅस सिलिंडर स्फोटामुळे 2 जणांचा मृत्यू झाला असून 9 जण गंभीर जखमी झाले आहेत.
पहाटे 5 वाजता लागली आग
ही दुर्घटना कापोद्रा येथील एका इमारतीच्या तिसऱ्या मजल्यावर गुरुवारी पहाटे सुमारे 5 वाजता घडली. सुरुवातीला लागलेली आग वेगाने पसरत किचनपर्यंत पोहोचली आणि तिथे ठेवलेल्या एलपीजी सिलिंडरचा भीषण स्फोट झाला.
सिलिंडर स्फोटामुळे आग भडकली
अग्निशमन दलाच्या माहितीनुसार, इमारतीत एकूण 8 गॅस सिलिंडर होते. त्यापैकी 2 सिलिंडरचा स्फोट झाल्याने आग आणखी भडकली आणि मोठे नुकसान झाले. अग्निशमन दल घटनास्थळी पोहोचण्यापूर्वीच एक स्फोट झाला होता.
11 जणांची सुटका, 9 जखमी
अग्निशमन दलाच्या जवानांनी तिसऱ्या मजल्यावरील पत्रे तोडून आत अडकलेल्या नागरिकांना बाहेर काढले. एकूण 11 जणांना बाहेर काढण्यात आले असून त्यापैकी 2 जणांचा मृत्यू झाला, तर 9 जणांना तातडीने रुग्णालयात दाखल करण्यात आले आहे.
चौकशी सुरू
या घटनेमागील नेमकं कारण अद्याप स्पष्ट झालेलं नसून प्रशासनाने चौकशी सुरू केली आहे. सुरक्षेच्या दृष्टीने परिसर सील करण्यात आला असून पुढील तपास सुरू आहे.
