श्रीक्षेत्र माहूरगड दत्त जयंती यात्रेसाठी तयारी जोरात; प्रशासनाची आढावा बैठक संपन्न
श्रीक्षेत्र माहूरगड येथे होणाऱ्या श्री दत्त जयंती यात्रा महोत्सवासाठी प्रशासनाकडून मोठ्या प्रमाणावर तयारी सुरू झाली आहे. दरवर्षी लाखो भाविकांच्या गर्दीचा विचार करून आज पंचायत समितीच्या कै. वसंतराव नाईक सभागृहात महत्त्वपूर्ण आढावा बैठक घेण्यात आली. नायब तहसीलदार कैलास जेठे यांनी उपस्थित विभागप्रमुखांकडून नियोजनाची माहिती घेत कडक सूचना दिल्या.
भाविकांच्या सोयीसाठी सर्व विभाग सज्ज
दत्त जयंतीनिमित्त लाखो भाविक माहूरगडावर दर्शनासाठी येतात. पाण्याची व्यवस्था, आरोग्य सेवा, वाहतूक नियंत्रण, स्वच्छता, विजेची सोय आणि आपत्कालीन सुविधा यांचे सुयोग्य नियोजन व्हावे यासाठी प्रशासन पूर्णपणे कार्यरत आहे.
नायब तहसीलदारांकडून कडक सूचना
बैठकीचे नेतृत्व करणारे नायब तहसीलदार कैलास जेठे यांनी प्रत्येक विभागाकडून सविस्तर अहवाल मागवला. काही अधिकारी अनुपस्थित असल्याचे निदर्शनास आल्यानंतर त्यांनी 27 नोव्हेंबर रोजी सहाय्यक जिल्हाधिकारी जेनीत चंद्रा दोन्तूला यांच्या अध्यक्षतेखाली होणाऱ्या व्यापक बैठकीस सर्वांनी अनिवार्य उपस्थित राहण्याचे आदेश दिले.
बैठकीत उपस्थित अधिकारी व प्रतिनिधी
बैठकीस खालील अधिकारी आणि मान्यवर उपस्थित होते—
- नायब तहसीलदार कैलास जेठे
- नायब तहसीलदार सूर्यवंशी मॅडम
- सपोनी शरद घोडके
- सहाय्यक गटविकास अधिकारी पी. डी. मुरादे
- पाणीपुरवठा व सार्वजनिक बांधकाम विभागाचे उपविभागीय अभियंता डी. के. भिसे
- तालुका आरोग्य अधिकारी डॉ. आर. डी. माचेवार
- मराविम अभियंता आर. बी. शेंडे
- वैद्यकीय अधिकारी डॉ. ए. डी. आंबेकर
- आगार प्रमुख चंद्रशेखर समर्थवाड
- राष्ट्रीय महामार्ग विभागाचे ए. जी. हजारे व पी. व्ही. हंचाटे
- वनपाल एन. एन. कत्तुलवार
- पो. का. गजानन जाधव
- मंडळ अधिकारी चंदनकर
- श्री दत्त शिखर संस्थानचे सचिव प्राचार्य डॉ. गणेश पाटील
- विविध धार्मिक संस्थांचे विश्वस्त व स्थानिक पत्रकार
यात्रेत त्रुटीला जागा नाही — नायब तहसीलदार जेठे
नायब तहसीलदार जेठे यांनी आदेश दिले की—
“दरवर्षीप्रमाणे यावर्षीही यात्रेत कोणतीही त्रुटी राहता कामा नये. भाविकांना आवश्यक सर्व सुविधा वेळेत उपलब्ध करून देणे प्रत्येक विभागाची जबाबदारी आहे.”
प्रत्येक विभागाने आपले नियोजन वेळेत पूर्ण करून, 27 तारखेच्या बैठकीस सर्व अहवालांसह हजर राहण्याच्या स्पष्ट सूचना प्रशासनाने दिल्या आहेत.
