नेपाळमधील हिंसाचार रोखण्यासाठी भारताचा मोठा निर्णय? मोदींचे संकेत स्पष्ट; म्हणाले, “नेपाळमधील माझ्या सर्व बंधू-भगिनींना…”
नवी दिल्ली : नेपाळमध्ये गेल्या काही दिवसांपासून सुरू असलेली सामाजिक अस्थिरता आणि हिंसाचार चिघळत चालला आहे. सरकार कोसळल्यानंतर देशभरात आंदोलकांनी रस्त्यावर उतरून जोरदार हिंसक आंदोलनं केली आहेत. सोशल मीडियावर बंदी घातल्यानंतर सुरू झालेल्या या जनआंदोलनात 20 हून अधिक जणांचा मृत्यू झाल्याची माहिती आहे.
या सगळ्या पार्श्वभूमीवर भारताचे पंतप्रधान नरेंद्र मोदी यांनी मंगळवारी रात्री विशेष बैठक बोलावून नेपाळमधील परिस्थितीवर चिंता व्यक्त केली आणि शांततेचं आवाहन केलं आहे.
नेपाळमध्ये काय घडलं?
आंदोलक रस्त्यावर उतरले, हिंसाचारात 20 जणांचा मृत्यू
माजी पंतप्रधान झलनाथ खनाल यांच्या पत्नी राजलक्ष्मी खनाल यांना जिवंत जाळल्याचा आरोप
सत्ताधारी नेते देश सोडून पलायन करत असल्याचं वृत्त
नेपाळ लष्कराने रात्री 10 वाजता सत्ता हाती घेतल्याची घोषणा
पंतप्रधान मोदींची प्रतिक्रिया
पंतप्रधान मोदींनी मंगळवारी रात्री 10:11 वाजता त्यांच्या अधिकृत एक्स (पूर्वीचं ट्विटर) अकाऊंटवरून पोस्ट करत नेपाळमधील घडामोडींवर आपली प्रतिक्रिया दिली. ते म्हणाले:
“आज हिमाचल प्रदेश आणि पंजाबहून परतल्यावर, सुरक्षा विषयक मंत्रिमंडळ समितीच्या बैठकीत नेपाळमधील घडामोडींवर चर्चा झाली. नेपाळमधील हिंसाचार हृदयद्रावक आहे. अनेक तरुणांनी प्राण गमावले, हे अत्यंत दुःखद आहे. नेपाळची स्थिरता, शांतता आणि समृद्धी आपल्यासाठी खूप महत्त्वाची आहे. मी नेपाळमधील माझ्या सर्व बंधू आणि भगिनींना शांततेला पाठिंबा देण्याचे नम्र आवाहन करतो.”
भारत सरकारकडून मोठा निर्णय लवकरच?
या बैठकीनंतर राजकीय वर्तुळात चर्चा आहे की भारत सरकारकडून नेपाळबाबत धोरणात्मक निर्णय घेतला जाऊ शकतो. भारत-नेपाळ संबंध, नेपाळमधील चीनचा वाढता हस्तक्षेप, आणि राजकीय अस्थिरता याच्या पार्श्वभूमीवर भारताचे धोरण काय असणार याकडे सगळ्यांचं लक्ष लागलं आहे.
शिवसेनेचा केंद्रावर हल्लाबोल
दरम्यान, उद्धव ठाकरे यांच्या शिवसेनेनं केंद्र सरकारवर जोरदार टीका केली आहे. त्यांच्या म्हणण्यानुसार:
“नेपाळ आता भारतापेक्षा चीनच्या अधिक जवळ गेला आहे. पूर्वी नेपाळचे पंतप्रधान भारतात येत असत, आता ते चीन आणि पाकिस्तानात जातात. नेपाळचा भगवा रंग आता लालभडक झाला आहे. हे भारताच्या परराष्ट्र धोरणाचं अपयश आहे.”
तसेच, त्यांनी चीनच्या वाढत्या प्रभावावर चिंता व्यक्त करत म्हटलं की, “शेकडो चिनी शिक्षक नेपाळमध्ये आहेत आणि तिथल्या लोकांना चिनी भाषा शिकवत आहेत.”
नेपाळचं भविष्य अनिश्चित, भारताची भूमिका निर्णायक?
सध्याची नेपाळमधील परिस्थिती पाहता, तेथील राजकीय-सामाजिक अस्थिरता आणि चीनचा वाढता हस्तक्षेप भारतासाठी गंभीर चिंतेचा विषय बनत आहे. अशावेळी भारताने डिप्लोमसीसोबतच प्रभावी हालचाली करण्याची गरज असल्याची चर्चा राजकीय तज्ज्ञ करत आहेत.
