‘व्यवस्थे’च्या अभावी ५ वर्षांच्या चिमुकल्याचा मृतदेह खाटेवरून नेला!
गडचिरोली: गडचिरोली जिल्ह्यातून एक मन हेलावून टाकणारी घटना समोर आली आहे. पायाभूत सुविधांच्या अभावामुळे आदिवासी बांधवांना किती त्रास सहन करावा लागतो, याचे भयाण वास्तव पुन्हा एकदा समोर आले आहे. भामरागड तालुक्यातील एका ५ वर्षीय मुलाचा मृतदेह, रस्ते आणि पुलांच्या अभावामुळे, गावकऱ्यांना खाटेची कावड करून पाण्यातून न्यावा लागला.
ही घटना भामरागड तालुक्यातील कोयर आणि मुरंगल गावाच्या दरम्यान घडली. पाच वर्षांचा रिशान प्रकाश पुंगाटी याचा नाल्यात बुडून मृत्यू झाला. नियमानुसार, मृतदेहाचे शवविच्छेदन करणे आवश्यक होते. मात्र, मृतदेह भामरागड तालुका मुख्यालयात घेऊन जाण्यासाठी गावकऱ्यांसमोर मोठा अडथळा उभा होता. कोयर आणि मुरंगल गावाच्या मधोमध असलेल्या नाल्यावर कोणताही पूल नाही.
यामुळे, गावकऱ्यांनी माणुसकी दाखवत एका खाटेवर रिशानचा मृतदेह ठेवला आणि ही खाट खांद्यावर घेऊन पाण्यातून जीवघेणा प्रवास केला. हे दृश्य पाहून प्रत्येकाचे मन हेलावून जाते. नाला पार केल्यानंतर त्यांना रुग्णवाहिका मिळाली, पण गावाजवळच्या नाल्यावर पूल असता तर कदाचित ही दुर्दैवी वेळ या आदिवासी बांधवांवर आली नसती.
ही घटना केवळ एका निष्पाप मुलाच्या मृत्यूची नसून, वर्षानुवर्षे दुर्लक्षित राहिलेल्या मूलभूत सुविधांची कहाणी आहे. दुर्गम भागातील नागरिकांना आजही अशा भयानक संकटांना सामोरे जावे लागते. या घटनेने प्रशासनाच्या कार्यक्षमतेवर आणि स्थानिक विकासावर पुन्हा एकदा गंभीर प्रश्नचिन्ह निर्माण केले आहे. संबंधित प्रशासनाने या गंभीर प्रश्नाकडे लवकरात लवकर लक्ष देणे आणि आवश्यक उपाययोजना करणे गरजेचे आहे, जेणेकरून भविष्यात कोणावरही अशी वेळ येणार नाही.
