नवी दिल्ली : स्वच्छ भारत मिशन, शहरी श्रेणीअंतर्गत आयोजित स्वच्छ सर्वेक्षण २०२४-२५’च्या सुपर लीगमध्ये मध्य प्रदेशातील इंदूर शहराने सलग आठव्यांदा देशातील सर्वांत स्वच्छ शहराचा पुरस्कार पटकावला. सुरत दुसऱ्या, तर नवी मुंबई तिसऱ्या स्थानी आहे. मुंबईच्या कामगिरीत किंचित सुधारणा झाली असून शहराचा ३३वा क्रमांक आला. या आधी मुंबई ३७व्या स्थानी होती. राष्ट्रीय स्वच्छ सर्वेक्षणात महाराष्ट्राला १० पुरस्कार मिळाले.
दिल्लीत गुरुवारी झालेल्या सोहळ्यात राष्ट्रपती द्रौपदी मुर्मू यांच्या हस्ते ७८ महापालिका, नगरपालिकांना स्वच्छतेसाठीच्या पुरस्कारांनी गौरविण्यात आले. नगरविकास राज्यमंत्री माधुरी मिसाळ, प्रधान सचिव (नगरविकास) डॉ. के. एच. गोविंदराज, स्वच्छ महाराष्ट्र मिशनचे संचालक नवनाथ वाठ यांच्यासह महापालिका आयुक्तांनी पुरस्कार स्वीकारले.
मिरा-भाईंदर महापालिका- अत्याधुनिक कचरा व्यवस्थापन प्रणाली, मशिनद्वारे कचरा संकलन आणि जनजागृती या श्रेणीत देशात अव्वल
मुंबई महापालिकेची कचरा संकलन आणि वर्गीकरणात पीछेहाट. घरोघरी जाऊन कचरा संकलनाचे प्रमाण ४० टक्के, तर जागीच कचरा वर्गीकरणाचे प्रमाण ३१ टक्के
पनवेल महापालिकेने तीन ते दहा लाख लोकसंख्येच्या गटात देशात सहावा क्रमांक पटकावला आहे.
स्वच्छ सर्वेक्षणात पनवेल देशात सहावे
पनवेल : केंद्र सरकारच्या केंद्रीय व कार्य महातिमयाण्या वतीने दरदयों घेतल्या जाणाऱ्या स्वच्छता सर्वेक्षणामध्ये पनवेल महानगरपालिकेने बाजी मारली आहे. स्वच्छ सर्वेक्षण तीन लाख ते दहा लाख लोकसंख्येच्या गटात पनवेल महापालिकेने देशात सहावा क्रमांक पटकाविला आहे. तर कचरामुक्त शहर मानांकनात तीन स्टार आणि ओडीएफमध्ये सर्वोच्च वॉटरप्लस ही सर्वोच्च श्रेणीदेखील कायम राखली आहे. या यशाबद्दल महापालिकेच्या आरोग्य विभागाचे कौतुक केले जात आहे.
११० चौरस किलोमीटर क्षेत्रात स्वच्छता राखण्यात महापालिकेने बाजी मारली आहे. स्वच्छतेच्या आघाडीवर केवळ क्रमांकच नव्हे तर गुणवत्तेचेही मानांकन मिळवण्यात पनवेल महानगरपालिकेला यश आले आहे. पालिकेने आपल्या यशाची परंपरा कायम राखत कचरामुक्त शहर मानांकनात श्री स्टार मानांकन सलग चौथ्या वर्षी कायम ठेवले. स्वच्छ भारत अभियानांतर्गत सार्वजनिक शौचालयांची व्यवस्था, सांडपाणी व्यवस्थापन व स्वच्छतागृह वापर यामधील उत्कृष्ट कार्यासाठी ओडीएफमधील वॉटरप्लस ही सर्वोच्च श्रेणीदेखील शहराने सलग राखली आहे.
शहरातील स्वच्छतेबाबत नागरिकांना असलेली जाणीव, शिस्त आणि महानगरपालिकेच्या सततच्या प्रयत्नांचे हे फलित आहे. स्पर्धेचा निकाल जाहीर होताच आरोग्य विभागाचे उपायुक्त डॉ. वैभव विधाते यांच्या सहकाऱ्यांनी आनंदोत्सव साजरा केला. पालिका आयुक्त मंगेश चितळे यांनी डॉ. वैभव विधाते यांच्यासह अधिकारी सहायक आयुक्त श्रीराम पवार, विभागप्रमुख अनिल कोकरे, मुख्य आरोग्य निरीक्षक, अभियंता, स्वच्छता निरीक्षक आणि कर्मचारी आदींचे अभिनंदन केले.
लोकप्रतिनिधी आणि नागरिकांच्या सहभागामुळे हे यश लाभले असून, पुढील काळातही पनवेल महानगरपालिका अशाच प्रकारे देशपातळीवर उत्कृष्टता सिद्ध करत राहील. नागरिक, सफाई कामगार, आरोग्य विभागातील कर्मचारी यांच्या प्रयत्नांमुळेच महानगरपालिकेला हे यश मिळू शकले.
