यवतमाळमध्ये एसटी बस-दुचाकीची भीषण धडक; दोन सख्ख्या भावांसह तिघांचा मृत्यू!
दारव्हा–आर्णी मार्गावरील सायखेडा नजीक भीषण अपघात; मृतांमध्ये १५ वर्षीय मुलाचाही समावेश, रामगाव हरू गावावर शोककळा
यवतमाळ जिल्ह्यातील दारव्हा–आर्णी मार्गावर सायखेडा नजीक एसटी बस आणि दुचाकीची भीषण धडक होऊन तिघांचा मृत्यू झाला आहे. मृतांमध्ये दोन सख्ख्या भावांसह एका १५ वर्षीय मुलाचा समावेश आहे. अपघातानंतर तिघांना दारव्हा येथील उपजिल्हा रुग्णालयात दाखल करण्यात आले; मात्र डॉक्टरांनी त्यांना मृत घोषित केले. या दुर्घटनेमुळे रामगाव हरू गावासह परिसरात शोककळा पसरली आहे.
यवतमाळ : दारव्हा–आर्णी मार्गावरील सायखेडा नजीक एसटी बस आणि दुचाकी यांच्यात झालेल्या भीषण अपघातात तिघांना जीव गमवावा लागला. या दुर्घटनेत किशोर रामराव चव्हाण (वय ३३), दीपक रामराव चव्हाण (वय २८) आणि पवन लक्ष्मण पवार (वय १५) यांचा मृत्यू झाला आहे. या घटनेने परिसरात हळहळ व्यक्त होत आहे.
मिळालेल्या माहितीनुसार, दारव्हा–आर्णी मार्गावर सायखेडा नजीक एसटी बस आणि दुचाकी यांच्यात जोरदार धडक झाली. अपघातात गंभीर जखमी झालेल्या तिघांनाही तातडीने दारव्हा येथील उपजिल्हा रुग्णालयात उपचारासाठी दाखल करण्यात आले. मात्र, वैद्यकीय तपासणीनंतर डॉक्टरांनी तिघांनाही मृत घोषित केले.
या अपघातातील किशोर चव्हाण आणि दीपक चव्हाण हे सख्खे भाऊ होते. एकाच कुटुंबातील दोन भावांचा मृत्यू झाल्याने त्यांच्या कुटुंबावर दुःखाचा डोंगर कोसळला आहे. तसेच १५ वर्षीय पवन पवार याच्या मृत्यूमुळेही परिसरातून हळहळ व्यक्त केली जात आहे. या दुर्दैवी घटनेनंतर रामगाव हरू गावासह आसपासच्या परिसरात शोककळा पसरली आहे.
अपघातातील एसटी बसचा क्रमांक एमएच ४० एन ९९८३, तर दुचाकीचा क्रमांक एमएच १४ जे ९२३८ असल्याची माहिती समोर आली आहे.
दरम्यान, हा भीषण अपघात नेमका कशामुळे झाला, हे अद्याप स्पष्ट झालेले नाही. अपघाताच्या कारणांचा शोध घेण्यासाठी पोलीस पुढील तपास करीत आहेत.
