दुष्काळाचा सामना करण्यासाठी चारा आणि पाण्याचे नियोजन; आशिष जयस्वाल यांची माहिती

शासकीय जमीन बचत गटांना लीजवर देऊन चारा उत्पादन वाढवण्याचे नियोजन; गडचिरोलीतील जुगारप्रकरणी कारवाईचे आश्वासन

नागपूर : राज्यातील दुष्काळी परिस्थितीच्या पार्श्वभूमीवर पशुधनासाठी चारा उपलब्ध करून देण्यासाठी शासनाकडून नियोजन करण्यात येत असल्याची माहिती राज्यमंत्री आशिष जयस्वाल यांनी दिली. महसूल मंत्री यांच्यासोबत याबाबत चर्चा सुरू असून, दुष्काळग्रस्त भागातील पाण्याचे आणि चाऱ्याचे नियोजन करण्यासाठी सरकार प्रयत्नशील असल्याचे त्यांनी सांगितले.

शासकीय जमीन बचत गटांना लीजवर देण्याचे नियोजन

राज्यातील शासकीय जमीन बचत गटांना लीजवर देऊन त्यावर मोठ्या प्रमाणात चारा उत्पादन करण्याचे धोरण यापूर्वीच करण्यात आले असल्याचे जयस्वाल यांनी सांगितले.

प्रत्येक जिल्ह्याची चाऱ्याची गरज लक्षात घेऊन दुष्काळग्रस्त भागातील परिस्थितीशी इतर जिल्ह्यांची सांगड कशी घालता येईल, यावर चर्चा सुरू असल्याचे त्यांनी स्पष्ट केले.

दुष्काळ समितीचे अध्यक्ष असलेल्या महसूल मंत्र्यांनी यासंदर्भात बैठक आयोजित केली असल्याचेही जयस्वाल यांनी सांगितले. मार्च, एप्रिल आणि मे महिन्यात निर्माण होऊ शकणाऱ्या परिस्थितीचा अंदाज घेऊन सरकारकडून आवश्यक निर्णय घेतले जातील, असे त्यांनी स्पष्ट केले.

गडचिरोलीतील जुगारप्रकरणी योग्य कारवाईचे आश्वासन

गडचिरोली जिल्ह्यातील कथित जुगारप्रकरणावरही आशिष जयस्वाल यांनी प्रतिक्रिया दिली. या प्रकरणाची माहिती जिल्ह्याचे पोलीस अधीक्षक घेत असल्याचे त्यांनी सांगितले.

गडचिरोलीचे पोलीस दल सक्रिय असून जिल्ह्याचा मोठा भौगोलिक भाग दुर्गम आहे. अशा ठिकाणी काही घटना घडल्या असतील तर त्याची दखल घेऊन योग्य ती कारवाई केली जाईल, असे जयस्वाल यांनी स्पष्ट केले.

कायदा कितीही कडक असला तरी मोठ्या आणि दुर्गम जिल्ह्यात काही घटना घडू शकतात. मात्र, संबंधित प्रकाराची माहिती घेऊन दोषींवर नियमानुसार कारवाई केली जाईल, असे त्यांनी सांगितले.

मंगेश चिवटे यांच्या उमेदवारीवर जयस्वाल काय म्हणाले?

शिक्षक मतदारसंघातील उमेदवारीच्या चर्चेवर बोलताना आशिष जयस्वाल यांनी मंगेश चिवटे यांचा उल्लेख केला. मंगेश चिवटे हे गेल्या अनेक दिवसांपासून संपर्कात असून त्यांनी आरोग्य क्षेत्रात चांगले काम केल्याचे जयस्वाल यांनी सांगितले.

महायुतीचे नेते म्हणून एकनाथ शिंदे या संदर्भात योग्य निर्णय घेतील, असे त्यांनी स्पष्ट केले. मंगेश चिवटे यांच्यासारख्या कार्यकर्त्याला उमेदवारी मिळावी, अशी अपेक्षा अनेकांची होती; मात्र अंतिम निर्णय शिंदे घेतील, असे जयस्वाल यांनी सांगितले.

विजय वडेट्टीवार यांच्या टीकेला प्रत्युत्तर

काँग्रेस नेते विजय वडेट्टीवार यांच्या टीकेवर प्रतिक्रिया देताना आशिष जयस्वाल यांनी त्यांच्यावर टोला लगावला.

दुसऱ्याकडे एक बोट दाखवताना चार बोटे आपल्याकडे असतात, असे म्हणत जयस्वाल यांनी वडेट्टीवार यांच्या टीकेला प्रत्युत्तर दिले. वडेट्टीवार हे विरोधी पक्षात असून ते त्यांचे काम करत असल्याचेही जयस्वाल यांनी नमूद केले.