शोभा माता मंदिराजवळ ऑटोला भीषण धडक; पाच मुली गंभीर जखमी
सालबर्डी दर्शनासाठी निघालेल्या मुलींच्या ऑटोला चारचाकी वाहनाची धडक; संतप्त नागरिकांचा चक्काजाम
धामणगाव रेल्वे : तालुक्यातील चिचपूर येथून सालबर्डी येथे दर्शनासाठी निघालेल्या पाच मुलींच्या प्रवासी ऑटोला चारचाकी वाहनाने जोरदार धडक दिल्याची भीषण घटना पिंपळखुटा-अंजनसिंगी मार्गावरील शोभा माता मंदिराजवळ घडली. या अपघातात ऑटोमधील पाचही मुली गंभीर जखमी झाल्या असून, त्यांना तातडीने उपचारासाठी अमरावती येथील जिल्हा सामान्य रुग्णालयात हलविण्यात आले आहे.
मिळालेल्या माहितीनुसार, चिचपूर येथील पाच मुली सालबर्डी येथे दर्शनासाठी प्रवासी ऑटोने निघाल्या होत्या. त्या पिंपळखुटा-अंजनसिंगी मार्गावरून जात असताना शोभा माता मंदिराजवळ समोरून आलेल्या चारचाकी वाहनाने त्यांच्या ऑटोला जोरदार धडक दिली.
धडक इतकी भीषण होती की ऑटो रस्त्याच्या कडेला जाऊन उतरला, तर चारचाकी वाहनाचीही दिशा बदलली. या अपघातात ऑटोमधील पाचही मुली गंभीर जखमी झाल्या.
घटनेची माहिती मिळताच परिसरातील नागरिकांनी तत्काळ मदतीसाठी धाव घेतली. नागरिकांनी ११२ क्रमांकावर संपर्क साधून पोलिसांना घटनेची माहिती दिली. माहिती मिळताच मंगरूळ दस्तगीर पोलिसांनी घटनास्थळी धाव घेतली.
जखमी मुलींना तातडीने उपचारासाठी अमरावती येथील जिल्हा सामान्य रुग्णालय अर्थात इरविन रुग्णालयात हलविण्यात आले. अपघातामुळे परिसरात काही काळ मोठी खळबळ उडाली.
दरम्यान, अपघातानंतर संतप्त झालेल्या नागरिकांनी शोभा माता मंदिराजवळ चक्काजाम आंदोलन केले. अपघातास कारणीभूत ठरलेल्या चारचाकी वाहनचालकावर कठोर कारवाई करण्यात यावी, अशी मागणी नागरिकांनी केली. चक्काजाम आंदोलनामुळे या मार्गावरील वाहतुकीवर काही काळ परिणाम झाला.
या अपघातामागचे नेमके कारण काय, चारचाकी वाहनाचा वेग किती होता आणि अपघातासाठी नेमकी कोणाची चूक होती, याचा तपास मंगरूळ दस्तगीर पोलीस करीत आहेत.
सालबर्डी दर्शनासाठी निघालेल्या पाच मुलींवर अचानक काळाचा घाला आल्याने चिचपूर परिसरात चिंता व्यक्त होत आहे. जखमी मुलींची प्रकृती आणि अपघाताच्या तपासाकडे आता नागरिकांचे लक्ष लागले आहे.
