नागपुरात १८ वर्षांपासून फरार आरोपी अखेर पोलिसांच्या ताब्यात!
वाडी पोलीस ठाण्यातील २००८ मधील गुन्ह्यातील आरोपीला वाहन चोरी विरोधी पथकाची कारवाई; गोपनीय माहितीच्या आधारे घेतले ताब्यात
नागपूर : नागपूरमध्ये तब्बल १८ वर्षांपासून फरार असलेल्या आरोपीला वाहन चोरी विरोधी पथकाने शोधून काढत ताब्यात घेतले आहे. भोला मधुकर सोनवणे (वय ५७, रा. आंबेडकर नगर, वाडी, नागपूर) असे या आरोपीचे नाव असून, वाडी पोलीस ठाण्यात २००८ मध्ये दाखल झालेल्या गुन्ह्याच्या अनुषंगाने ही कारवाई करण्यात आली.
मिळालेल्या माहितीनुसार, वाडी पोलीस ठाण्यात गुन्हा रजिस्टर क्रमांक २०७०/२००८ अन्वये भारतीय दंड विधानाच्या कलम ३४१ व इतर संबंधित कलमांनुसार गुन्हा दाखल करण्यात आला होता. या प्रकरणात भोला मधुकर सोनवणे हा आरोपी गेल्या १८ वर्षांपासून फरार होता.
वाहन चोरी विरोधी पथकातील पोलीस हवालदार रोशन आणि विलास यांनी गोपनीय माहितीच्या आधारे आरोपीचा शोध घेतला. त्यानंतर त्याला ताब्यात घेण्यात आले. पोलिसांनी आरोपीची ओळख आणि त्याच्याबाबतची माहिती पडताळून खात्री केली. तसेच, त्याची वैद्यकीय तपासणीही करण्यात आली.
पोलिसांच्या माहितीनुसार, ताब्यात घेतलेल्या आरोपीने गुन्ह्याची कबुली दिली आहे. तब्बल १८ वर्षांपासून प्रलंबित असलेल्या या प्रकरणातील फरार आरोपीचा शोध घेण्यात वाहन चोरी विरोधी पथकाला यश आले असून, या कारवाईमुळे जुन्या गुन्ह्यांच्या तपासाला महत्त्व प्राप्त झाले आहे.
