नागपुरातील गोधनीत क्लोरिन गॅस गळती; ४० जण रुग्णालयात
मध्यरात्री वॉटर ट्रीटमेंट प्लांटमधून विषारी वायूची गळती; एका बालकासह ३ रुग्ण आयसीयूमध्ये
नागपुरातील गोधनी परिसरात मध्यरात्री क्लोरिन गॅस गळतीमुळे एकच खळबळ उडाली. फागुजी नगरमधील वॉटर ट्रीटमेंट प्लांटच्या रिझर्व्ह क्लोरिन सिलिंडरमधून अचानक गॅस गळती झाल्याने विषारी वायू आसपासच्या घरांमध्ये शिरला. नागरिकांना श्वास घेण्यास त्रास होऊ लागल्याने अनेकांनी घराबाहेर धाव घेतली. या घटनेत तब्बल ४० जणांना रुग्णालयात दाखल करण्यात आलं असून, एका बालकासह तीन रुग्ण आयसीयूमध्ये उपचार घेत आहेत. दरम्यान, प्लांटमध्ये गळतीच्या वेळी एकही कर्मचारी उपस्थित नसल्याची माहिती समोर आल्याने सुरक्षिततेवर गंभीर प्रश्न उपस्थित झाले आहेत.
नागपूरमधील गोधनी नगरपंचायतीअंतर्गत फागुजी नगर परिसरात मध्यरात्री साडेबारा वाजताच्या सुमारास अचानक क्लोरिन गॅस गळती झाली.
फागुजी नगरमधील वॉटर ट्रीटमेंट प्लांटच्या रिझर्व्ह क्लोरिन सिलिंडरमधून ही गळती झाल्याची माहिती समोर आली आहे. प्लांटला लागूनच मोठ्या प्रमाणात वस्ती असल्याने गळती झालेला वायू आसपासच्या घरांमध्ये शिरला.
काही वेळातच नागरिकांना श्वास घेण्यास त्रास होऊ लागला. परिस्थिती गंभीर होताच अनेक नागरिकांनी घाबरून घराबाहेर धाव घेतली.
या घटनेत तब्बल ४० जणांना उपचारासाठी रुग्णालयात दाखल करण्यात आलं. त्यापैकी १३ जणांना उपचारानंतर घरी सोडण्यात आलं आहे. मात्र एका बालकासह तीन रुग्ण आयसीयूमध्ये उपचार घेत असून त्यांची प्रकृती गंभीर असल्याची माहिती आहे.
घटनेची माहिती मिळताच सामाजिक कार्यकर्त्यांच्या माध्यमातून पोलिसांना माहिती देण्यात आली. त्यानंतर पोलिसांनी तातडीने घटनास्थळी धाव घेतली.
सुरक्षिततेच्या दृष्टीने पोलिसांनी घटनास्थळाभोवतीचा सुमारे २०० मीटरचा परिसर रिकामा करून सील केला. अग्निशमन दल, एनडीआरएफ आणि स्थानिक पोलीस पथक घटनास्थळी दाखल झाले. परिस्थिती नियंत्रणात आणण्यासाठी तातडीने बचावकार्य सुरू करण्यात आलं.
या गॅस गळतीचा परिणाम केवळ नागरिकांवरच झाला नाही. गॅसच्या संपर्कात आल्याने एका कुत्र्याचा मृत्यू झाल्याची माहिती आहे, तर दुसऱ्या कुत्र्याला नागरिकांनी सुरक्षितपणे वाचवलं.
या घटनेनंतर आणखी एक गंभीर बाब समोर आली आहे. गॅस गळती झाली त्यावेळी वॉटर ट्रीटमेंट प्लांटमध्ये कोणताही कर्मचारी उपस्थित नसल्याची माहिती मिळाली आहे.
त्यामुळे प्लांटच्या सुरक्षेची व्यवस्था नेमकी कशी होती आणि गळतीच्या वेळी कर्मचारी का उपस्थित नव्हते, याबाबत गंभीर प्रश्न उपस्थित होत आहेत.
सुदैवाने सध्या क्लोरिन गॅसची गळती पूर्णपणे थांबवण्यात आली आहे. आरोग्य यंत्रणेकडून परिसरातील नागरिकांची घरोघरी जाऊन तपासणी केली जात आहे.
अचानक मध्यरात्री घडलेल्या या घटनेमुळे फागुजी नगर आणि आसपासच्या परिसरात मोठी खळबळ उडाली आहे.
गोधनीतील क्लोरिन गॅस गळतीची परिस्थिती सध्या नियंत्रणात आली असली, तरी ४० नागरिकांना रुग्णालयात दाखल करण्याची वेळ आली. एका बालकासह तीन रुग्ण आयसीयूमध्ये असून त्यांची प्रकृती गंभीर आहे.
त्यातच गळतीच्या वेळी प्लांटमध्ये कर्मचारी उपस्थित नसल्याच्या माहितीनंतर सुरक्षाव्यवस्थेवर अनेक प्रश्न निर्माण झाले आहेत. आरोग्य यंत्रणेकडून नागरिकांची तपासणी सुरू असून, या संपूर्ण घटनेची जबाबदारी निश्चित करण्याची मागणी आता जोर धरू शकते.
