पाचपावली पोलिसांचा जुगार अड्ड्यांवर धडक छापा; १५ जणांवर कारवाई
लष्करी बाग, वैशालीनगर आणि नाईक तलाव परिसरात एकाचवेळी कारवाई; रोख रक्कम व जुगार साहित्य जप्त
नागपूर | प्रतिनिधी
नागपूर शहरातील पाचपावली पोलीस ठाण्याच्या हद्दीतील जुगार अड्ड्यांवर पोलिसांनी मोठी धडक कारवाई केली आहे. वरिष्ठ अधिकाऱ्यांच्या मार्गदर्शनाखाली लष्करी बाग, वैशालीनगर आणि नाईक तलाव परिसरात एकाचवेळी छापे टाकण्यात आले. या कारवाईत १५ जणांविरुद्ध गुन्हे नोंदवून रोख रक्कम आणि जुगार साहित्य जप्त करण्यात आले आहे.
पोलिसांनी दिलेल्या माहितीनुसार, पाचपावली पोलीस ठाण्याच्या हद्दीत सुरू असलेल्या अवैध जुगार अड्ड्यांवर डीबी पथकाने नियोजनबद्ध कारवाई केली. लष्करी बाग, वैशालीनगर आणि नाईक तलाव या तीन ठिकाणी एकाचवेळी छापे टाकण्यात आले.
या कारवाईदरम्यान एकूण १५ आरोपींवर कारवाई करण्यात आली. घटनास्थळावरून रोख रक्कम आणि जुगाराचे साहित्य असा सुमारे ३ हजार २०० रुपयांचा मुद्देमाल जप्त करण्यात आला.
ही कारवाई पाचपावली पोलीस ठाण्याच्या डीबी पथकाने एपीआय बोंडे यांच्या नेतृत्वाखाली केली. या मोहिमेत हवालदार तायडे, हवालदार समजुरे आणि हवालदार भटकर यांनी सहभाग घेतला.
अवैध जुगार आणि इतर बेकायदेशीर धंद्यांवर प्रभावी नियंत्रण ठेवण्यासाठी अशा प्रकारच्या धडक कारवाया यापुढेही सुरू राहणार असल्याचे पोलिसांनी स्पष्ट केले आहे. प्रकरणाचा पुढील तपास सुरू आहे.
