रामटेकमध्ये जनसंवाद व तक्रार निवारण सभा; नागरिकांच्या समस्यांवर तातडीच्या कारवाईचे निर्देश
वरिष्ठ पोलीस अधीक्षक हर्ष ए. पोद्दार यांचा पुढाकार; कायदा-सुव्यवस्था, वाहतूक व प्रलंबित तक्रारींवर नागरिकांशी थेट संवाद
रामटेक | प्रतिनिधी
नागपूर ग्रामीण पोलीस दलाच्या वतीने रामटेक पोलीस ठाण्यात जनसंवाद व तक्रार निवारण सभेचे आयोजन करण्यात आले. या सभेत नागपूर ग्रामीणचे वरिष्ठ पोलीस अधीक्षक हर्ष ए. पोद्दार यांनी नागरिकांच्या समस्या आणि तक्रारी थेट ऐकून घेत संबंधित अधिकाऱ्यांना तातडीने कारवाई करण्याचे निर्देश दिले.
पोलीस आणि नागरिक यांच्यातील संवाद अधिक प्रभावी करण्याच्या उद्देशाने आयोजित करण्यात आलेल्या या सभेला परिसरातील नागरिकांनी उत्स्फूर्त प्रतिसाद दिला. यावेळी कायदा व सुव्यवस्था, वाहतूक व्यवस्थेतील अडचणी, स्थानिक प्रश्न तसेच विविध प्रलंबित तक्रारींबाबत नागरिकांनी आपली मते मांडली.
प्रत्येक तक्रारीची गांभीर्याने दखल घेत वरिष्ठ पोलीस अधीक्षक हर्ष ए. पोद्दार यांनी संबंधित अधिकारी आणि कर्मचाऱ्यांना आवश्यक सूचना दिल्या. तसेच प्रलंबित प्रकरणांचे नियमानुसार व शक्य तितक्या लवकर निवारण करण्याचे स्पष्ट निर्देशही त्यांनी दिले.
या उपक्रमामुळे नागरिकांना पोलीस प्रशासनाशी थेट संवाद साधण्याची संधी मिळाली. नागरिकांच्या समस्या ऐकून त्यावर सकारात्मक पद्धतीने कार्यवाही करण्यासाठी पोलीस प्रशासन कटिबद्ध असल्याचा संदेश या सभेतून देण्यात आला.
या कार्यक्रमाला उपविभागीय पोलीस अधिकारी रमेश बरकते, पोलीस निरीक्षक राजेशकुमार थोरात, रामटेक पोलीस ठाण्यातील अधिकारी व कर्मचारी, पत्रकार तसेच मोठ्या संख्येने नागरिक उपस्थित होते.
पोलीस आणि नागरिक यांच्यातील परस्पर विश्वास अधिक दृढ करण्यासाठी अशा जनसंवाद व तक्रार निवारण सभांचे महत्त्व अधोरेखित करण्यात आले. नागरिकांच्या समस्या वेळेत सोडवून लोकाभिमुख पोलीस व्यवस्था उभारण्याचा प्रयत्न पुढेही सुरू राहणार असल्याचे यावेळी स्पष्ट करण्यात आले.
