वर्ध्यातील बांबर्डा गाव भीषण पाणीटंचाईच्या विळख्यात; ग्रामस्थांची पाण्यासाठी वणवण
वर्धा जिल्ह्यातील आष्टी तालुक्यातील बांबर्डा येथे सध्या भीषण पाणीटंचाई निर्माण झाली असून ग्रामस्थ पाण्यासाठी अक्षरशः त्रस्त झाले आहेत. गावातील पिण्याच्या पाण्याचा प्रश्न दिवसेंदिवस गंभीर होत चालला असून नागरिकांना मूलभूत गरज भागवण्यासाठी मोठी कसरत करावी लागत आहे.
माळेगाव येथील तलावातील पाणीसाठा कमालीचा घटल्यामुळे बांबर्डा गावातील पाणीपुरवठा व्यवस्था पूर्णपणे विस्कळीत झाली आहे. गावात सध्या चार ते पाच दिवसांनी एकदाच नळाला पाणी येत असल्याने नागरिकांचे मोठे हाल होत आहेत. अनेक कुटुंबांना पुरेसे पाणी मिळत नसल्याने घरगुती कामांसह पिण्याच्या पाण्यासाठीही संघर्ष करावा लागत आहे.
परिस्थिती इतकी बिकट झाली आहे की ग्रामस्थांना बैलगाडी, दुचाकी आणि इतर साधनांच्या मदतीने तब्बल दीड ते दोन किलोमीटर अंतरावरील शेतातील विहिरींवरून पाणी आणावे लागत आहे. उन्हाच्या तीव्र झळांमध्ये महिला, ज्येष्ठ नागरिक आणि लहान मुलांनाही पाण्यासाठी भटकंती करावी लागत असल्याचे चित्र गावात पाहायला मिळत आहे.
गावात मोठ्या प्रमाणावर पशुधन असल्यामुळे समस्या आणखी गंभीर बनली आहे. जनावरांच्या पाण्याची व्यवस्था करताना नागरिकांना मोठ्या अडचणींचा सामना करावा लागत आहे. सकाळपासूनच पाण्यासाठी धावपळ सुरू होत असून त्यामुळे शेतीच्या कामांवरही परिणाम होत आहे. शेतकऱ्यांना पाण्यासाठी वेळ खर्च करावा लागत असल्याने शेतीची कामे रखडत असल्याची नाराजी व्यक्त केली जात आहे.
दरम्यान, प्रशासनाकडून सध्या पाणी पुरवठा योजनेच्या विहिरीत टँकरद्वारे पाणी टाकण्याची तात्पुरती व्यवस्था करण्यात आली आहे. मात्र ही व्यवस्था अपुरी पडत असल्याचा आरोप ग्रामस्थांनी केला आहे. ग्रामपंचायतच्या माजी पदाधिकाऱ्यांनीही पाणीप्रश्न सोडवण्यासाठी प्रयत्न केले, मात्र अद्याप ठोस समाधान मिळालेले नाही.
स्थानिक नागरिकांच्या मते, दरवर्षी उन्हाळ्यात बांबर्डा गावाला पाणीटंचाईचा सामना करावा लागतो. तात्पुरत्या उपाययोजनांवर लाखो रुपये खर्च करण्याऐवजी प्रशासनाने कायमस्वरूपी जलस्रोत निर्माण करावेत, नवीन पाणीपुरवठा योजना राबवावी आणि गावासाठी शाश्वत उपाययोजना कराव्यात, अशी मागणी आता जोर धरत आहे.
पाणी ही मूलभूत गरज असताना आजही नागरिकांना थेंबथेंब पाण्यासाठी संघर्ष करावा लागत असल्याने ग्रामस्थांमध्ये तीव्र नाराजीचे वातावरण आहे. प्रशासनाने तातडीने लक्ष घालून कायमस्वरूपी उपाययोजना कराव्यात, अन्यथा आंदोलन छेडण्याचा इशाराही ग्रामस्थांनी दिला आहे.
