जालना इंधन टंचाईचा शेतीवर परिणाम; भोकरदनमध्ये शेतकरी पुत्रांचे अनोखे आंदोलन
जालना जिल्ह्यातील पेट्रोल-डिझेल टंचाईचा फटका आता थेट शेतकऱ्यांच्या शेतीकामांना बसू लागला आहे. मिरची उत्पादक शेतकरी संकटात सापडले असून औषध फवारणी आणि पाणीपुरवठ्याची कामे ठप्प झाली आहेत. याच पार्श्वभूमीवर भोकरदन तहसील कार्यालयासमोर संतप्त शेतकरी पुत्रांनी फवारणी पंप वाजवत अनोखे आंदोलन छेडले. प्रशासनाच्या धोरणाविरोधात जोरदार घोषणाबाजी करत शेतकऱ्यांना इंधन पुरवठा तातडीने सुरू करण्याची मागणी करण्यात आली.
जालना जिल्ह्यात निर्माण झालेल्या पेट्रोल आणि डिझेल टंचाईमुळे शेती क्षेत्रावर गंभीर परिणाम होत असल्याचे चित्र समोर आले आहे. भोकरदन तालुक्यातील शेतकरी आणि शेतकरी पुत्रांनी तहसील कार्यालयासमोर आंदोलन करत प्रशासनाचे लक्ष वेधण्याचा प्रयत्न केला.
मिरची उत्पादक शेतकऱ्यांसाठी सध्या औषध फवारणीचा अत्यंत महत्त्वाचा कालावधी सुरू आहे. मात्र पेट्रोल उपलब्ध होत नसल्यामुळे फवारणीची कामे रखडली आहेत. त्यामुळे पिकांवर रोगांचा प्रादुर्भाव वाढण्याची भीती शेतकऱ्यांकडून व्यक्त केली जात आहे.
दुसरीकडे डिझेलअभावी शेतातील पाणीपुरवठा करणारी इंजिने आणि ट्रॅक्टरही बंद पडल्याने मशागतीची कामे ठप्प झाली आहेत. पावसाळा तोंडावर असताना शेतीची तयारी रखडल्यामुळे शेतकरी मोठ्या चिंतेत आहेत.
भोकरदन तहसील कार्यालयासमोर झालेल्या आंदोलनात शेतकऱ्यांनी प्रशासनाच्या भूमिकेविरोधात जोरदार घोषणाबाजी केली. “शेतकऱ्यांना पेट्रोल-डिझेल मिळालेच पाहिजे” अशा घोषणांनी परिसर दणाणून गेला.
यावेळी नायब तहसीलदार बालाजी पुप्पलवाड आणि नायब तहसीलदार सदानंद नाईक यांच्यामार्फत जिल्हाधिकाऱ्यांना निवेदन सादर करण्यात आले. या निवेदनात शेतकऱ्यांच्या शेतीकामांसाठी इंधनाचा स्वतंत्र कोटा राखीव ठेवण्याची मागणी करण्यात आली आहे.
आंदोलनकर्त्यांनी सांगितले की, जिल्हाधिकाऱ्यांच्या आदेशानुसार कॅन किंवा बाटलीमध्ये पेट्रोल-डिझेल देण्यास बंदी घालण्यात आली आहे. त्यामुळे शेतातील फवारणी पंप किंवा इंजिन थेट पेट्रोल पंपावर नेणे शक्य नसल्याने शेतकऱ्यांची मोठी अडचण होत आहे.
शेतकरी पुत्र नारायण लोखंडे यांनी प्रशासनाने शेतकऱ्यांसाठी किमान ४० टक्के इंधन साठा राखीव ठेवावा, अशी मागणी केली. तर सामाजिक कार्यकर्ते विकास जाधव यांनी पावसाळ्यापूर्वीची शेतीची कामे रखडणे ही गंभीर बाब असल्याचे सांगत तातडीने उपाययोजना करण्याची मागणी केली.
दरम्यान, प्रशासनाने योग्य निर्णय न घेतल्यास जिल्हाभर तीव्र आंदोलन छेडण्याचा इशाराही आंदोलनकर्त्यांनी दिला आहे. त्यामुळे आता प्रशासन शेतकऱ्यांच्या मागण्यांवर काय भूमिका घेते, याकडे सर्वांचे लक्ष लागले आहे.
पेट्रोल-डिझेल टंचाईमुळे आधीच विविध संकटांचा सामना करणाऱ्या शेतकऱ्यांसमोर आता इंधनाचे नवे आव्हान उभे राहिले आहे. औषध फवारणी, पाणीपुरवठा आणि मशागतीची कामे रखडल्याने शेती व्यवस्थेवर गंभीर परिणाम होत आहेत. प्रशासनाने तातडीने उपाययोजना करून शेतकऱ्यांना दिलासा देण्याची मागणी जोर धरत आहे.
