नागपुरात महिला वकिलेकडून गंभीर आरोप; ताजबाग परिसरातील आरोपीविरुद्ध गुन्हा दाखल

नागपूर (प्रतिनिधी) – शहरातील Mankapur Police Station येथे एका महिला वकिलाने गंभीर स्वरूपाचे आरोप करत तक्रार दाखल केली आहे. तक्रारदार या जिल्हा व सत्र न्यायालयात वकिली करत असल्याची माहिती समोर आली आहे.

या प्रकरणातील आरोपीचे नाव सईद राजा वारीस अली असून तो नागपूरातील ताजबाग परिसरातील रहिवासी असल्याचे पोलिसांनी सांगितले. तक्रारीनुसार, कागदपत्रांच्या संदर्भात दोघांची ओळख झाली होती. त्याच कारणावरून आरोपीने संबंधित महिलेला आपल्या घरी बोलावले.

महिला आरोपीच्या घरी गेल्यानंतर तिला कॉफी देण्यात आली. मात्र त्या कॉफीत गुंगीचे औषध मिसळल्याचा गंभीर आरोप करण्यात आला आहे. त्यानंतर आरोपीने बंदुकीचा धाक दाखवत जीवे मारण्याची धमकी दिल्याचे तक्रारीत नमूद आहे. “तुझी बदनामी करीन… तुला मारून टाकीन” अशा स्वरूपाच्या धमक्या दिल्याचाही आरोप करण्यात आला आहे.

या दरम्यान पीडित महिलेच्या लहान मुलालाही आरोपीने काही काळ स्वतःजवळ ठेवून डिटेन करून ठेवल्याची बाब समोर आली आहे.

पोलिसांच्या माहितीनुसार आरोपी हा पूर्वीपासून रेकॉर्डवरील गुन्हेगार आहे. २०१३ ते २०१५ या कालावधीत त्याच्यावर जबरी चोरी, खुनाचा प्रयत्न, खंडणी वसुली, शस्त्र कायद्याचे उल्लंघन तसेच शासकीय कामात अडथळा आणणे असे अनेक गंभीर गुन्हे नोंद आहेत. त्याच्यावर Maharashtra Control of Organised Crime Act अंतर्गतही कारवाई करण्यात आली होती. काही वर्षांपूर्वी तो तुरुंगातून बाहेर आल्याची माहिती आहे.

सध्या या प्रकरणी पोलिसांनी गुन्हा दाखल केला असून वरिष्ठ अधिकाऱ्यांच्या मार्गदर्शनाखाली पुढील तपास सुरू आहे.