वाशिम जिल्ह्यातील कामरगावमध्ये तुरीवर प्रथमच ड्रोनद्वारे फवारणी; आधुनिक शेतीचे आदर्श मॉडेल
वाशिम : कामरगाव येथे शेती क्षेत्रात एक ऐतिहासिक नव्याची भर पडली आहे. पहिल्यांदाच ड्रोनच्या मदतीने तुरीच्या पिकावर फवारणी करण्यात आली असून हा उपक्रम आधुनिक शेतीसाठी एक आदर्श मॉडेल ठरत आहे. तंत्रज्ञानाचा वापर केल्यास शेती अधिक परिणामकारक आणि आर्थिकदृष्ट्या फायदेशीर कशी होऊ शकते याचे हे उत्तम उदाहरण मानले जात आहे.
कामरगाव येथील युवा शेतकरी शिवाजी किसनराव पाटील यांनी हा उपक्रम राबवला. सांगलीवरून आणलेल्या विशेष ड्रोनद्वारे ही फवारणी करण्यात आली. या भागातील तुरीची झाडी तीन ते चार फुटांपर्यंत वाढल्याने पारंपरिक पद्धतीने फवारणी करणे कठीण, धोकादायक आणि खर्चिक ठरत होते. मजूर उपलब्ध नसणे आणि पंपाद्वारे फवारणीसाठी लागणारा वाढता खर्च यामुळे ड्रोन हा उत्तम पर्याय ठरला.
ड्रोन फवारणी पाहण्यासाठी कारंजा लाड तालुक्यातील अनेक शेतकरी सकाळपासूनच मोठ्या संख्येने उपस्थित होते. कमी वेळात मोठ्या क्षेत्रावर प्रभावी फवारणी होत असल्याचे पाहून शेतकऱ्यांमध्ये उत्सुकता आणि आनंद दोन्ही जाणवत होते.
शेतकरी शिवाजी पाटील म्हणाले, “आमचं पीक उत्तम आलं होतं. आतापर्यंत फवारणीची गरज नव्हती, परंतु आवश्यकता भासल्यावर ड्रोन हा सर्वात योग्य पर्याय ठरला. वेळही वाचला आणि मजुरीवरील खर्चदेखील कमी झाला.”
या उपक्रमामुळे प्रभावित होऊन परिसरातील अनेक शेतकऱ्यांनी येत्या हंगामात आपल्या शेतातही ड्रोन फवारणीचा वापर करण्याचा निर्णय घेतला आहे. भविष्यात हे तंत्रज्ञान शेतकऱ्यांसाठी मोठा आधार ठरणार असल्याची अपेक्षा व्यक्त केली जात आहे.
