ठाकरेंची जागावाटपावर चर्चा? अचानक राज ठाकरेंच्या घरी पोहोचले उद्धव ठाकरे; सोबत राऊत आणि परब
मुंबई : राजकीय वर्तुळात खळबळ उडवणारी एक महत्त्वपूर्ण भेट आज मुंबईत झाली आहे. महाराष्ट्रातील आगामी स्थानिक स्वराज्य संस्थांच्या निवडणुकीच्या पार्श्वभूमीवर, शिवसेना (उद्धव बाळासाहेब ठाकरे) पक्षप्रमुख उद्धव ठाकरे आज अचानक मनसे अध्यक्ष राज ठाकरे यांच्या दादर येथील निवासस्थानी पोहोचले.
या अनपेक्षित भेटीमुळे मुंबई महानगरपालिका निवडणुकीसह राज्यातील आगामी निवडणुकांबाबत ठाकरे बंधू पुन्हा एकत्र येणार का? या चर्चांना जोर मिळाला आहे.
उद्धव ठाकरेंसोबत कोण होते?
उद्धव ठाकरे यांच्यासोबत या भेटीसाठी खासदार संजय राऊत आणि माजी मंत्री अनिल परब हे दोन महत्त्वाचे नेते उपस्थित होते. ही भेट पूर्णतः राजकीय स्वरूपाची असल्याची माहिती आहे.
विशेष म्हणजे, उद्धव ठाकरेंसोबत आदित्य ठाकरे उपस्थित नव्हते, त्यामुळे या भेटीमागील खऱ्या राजकीय गणिताविषयी उत्सुकता आणखी वाढली आहे.
जागावाटपावर चर्चा?
या भेटीच्या पार्श्वभूमीवर अनेक राजकीय निरीक्षक मुंबई महानगरपालिका निवडणुकीतील जागावाटप किंवा युतीच्या शक्यतेवर ही चर्चा केंद्रित झाल्याचा अंदाज व्यक्त करत आहेत.
राज आणि उद्धव यांची जोडी मराठी मतदारांमध्ये पुन्हा एक विश्वास निर्माण करू शकते, आणि त्यामुळे भाजप-शिंदे गट, राष्ट्रवादी आणि काँग्रेसलाही फटका बसू शकतो, असे राजकीय जाणकार मानतात.
मुंबईत आज महत्त्वाचा दिवस!
आजच प्रभाग रचनेसंदर्भात आक्षेप नोंदवण्याचा शेवटचा दिवस असल्याने आणि प्रभागांचं अंतिम आरेखन जाहीर होणार असल्यामुळे ही भेट केवळ औपचारिक नसून, गंभीर राजकीय डावपेचाचा भाग असण्याची शक्यता नाकारता येत नाही.
मागील दोन महिन्यांत चौथी भेट
ही उद्धव-राज यांची दोन महिन्यांतील चौथी भेट ठरली आहे:
5 जुलै 2025: हिंदी अभ्यासक्रमाविरोधातील विजय जल्लोष कार्यक्रमात दोघेही एकाच मंचावर
27 जुलै 2025: राज ठाकरे यांनी ‘मातोश्री’वर जाऊन उद्धव ठाकरेंना वाढदिवसाच्या शुभेच्छा दिल्या
गणेशोत्सव 2025: उद्धव ठाकरेंनी सहकुटुंब राज ठाकरेंच्या निवासस्थानी जाऊन गणपतीचं दर्शन घेतलं
10 सप्टेंबर 2025: आजची अचानक व चर्चास्पद भेट
दसरा मेळाव्यात ‘ठाकरे विरुद्ध ठाकरे’ की एकत्र मंचावर?
यावर्षीचा दसरा मेळावा अवघ्या काही आठवड्यांवर आला आहे. या पार्श्वभूमीवर, राज ठाकरे उद्धव ठाकरेंच्या मेळाव्यात सहभागी होणार का, की स्वतःचा वेगळा कार्यक्रम घेणार – याबाबत उत्सुकता ताणली जात आहे.
राजकीय वर्तुळात चर्चा तेज
राजकीय जाणकारांचं म्हणणं आहे की, दोन्ही पक्षांमध्ये मुंबई आणि ठाणे महापालिकांमध्ये जागा वाटप, मराठी मतांवर लक्ष केंद्रित करणं आणि सत्ताधारी आघाडीकडे असलेल्या मराठी मतांच्या नाराजीचा फायदा घेण्याचा डाव यामागे असू शकतो.
दोन्ही पक्षांची राजकीय भाषा, मतदार वर्ग आणि धोरणं जुळणारी असल्यामुळे एकत्र येण्याची शक्यता अधिकच वाटते.
