citynewsMaharashtraNagpur

अंबाझरी घाटावर छठ महापर्वाचा उत्साह; १० हजारांहून अधिक भाविकांनी मावळत्या सूर्याला अर्पण केले अर्घ्य

भाजप शहराध्यक्ष दयाशंकर तिवारी, उत्तर भारतीय सभा आणि सामाजिक संस्थांच्या पुढाकारातून आयोजन; छठी मैयाच्या जयघोषाने अंबाझरी परिसर दुमदुमला

नागपूर : उपराजधानी नागपूरमध्ये लोकआस्थेचे प्रतीक असलेल्या छठ महापर्वाचा उत्साह मोठ्या भक्तिमय वातावरणात पाहायला मिळाला. भाजपचे शहराध्यक्ष दयाशंकर तिवारी, उत्तर भारतीय सभा तसेच विविध सामाजिक संस्थांच्या वतीने अंबाझरी घाट परिसरात छठ पूजेचे आयोजन करण्यात आले होते. या धार्मिक सोहळ्याला १० हजारांहून अधिक छठव्रती आणि भाविकांनी उपस्थिती लावली. हजारो भाविकांच्या उपस्थितीमुळे संपूर्ण अंबाझरी घाट परिसर छठी मैयाच्या जयघोषाने दुमदुमून गेला.

छठ महापर्वाच्या तिसऱ्या दिवशी सायंकाळी छठव्रतींनी अंबाझरी घाटावर मावळत्या सूर्यदेवाला अर्घ्य अर्पण करून विधिवत पूजा-अर्चना केली. पारंपरिक पद्धतीने पूजेचे साहित्य आणि फळांनी सजवलेली पूजेची दालने घेऊन महिला व पुरुष व्रती घाटावर दाखल झाले होते. यावेळी अनेक भाविक आपल्या कुटुंबीयांसह उपस्थित होते. सूर्यदेवाप्रती कृतज्ञता व्यक्त करत कुटुंबाच्या सुख, समृद्धी आणि आरोग्यासाठी प्रार्थना करण्यात आली. संपूर्ण परिसरात भक्ती, श्रद्धा आणि उत्साहाचे वातावरण निर्माण झाले होते.

चार दिवसांच्या व्रताची धार्मिक परंपरा

छठ महापर्व चार दिवस साजरे केले जाते. पहिल्या दिवशी नहाय-खाय या विधीने पर्वाला सुरुवात होते. दुसऱ्या दिवशी खरना केला जातो. तिसऱ्या दिवशी सायंकाळी मावळत्या सूर्याला अर्घ्य अर्पण केले जाते, तर चौथ्या आणि अंतिम दिवशी उगवत्या सूर्याला अर्घ्य देऊन व्रताची सांगता केली जाते. सकाळच्या अर्घ्यानंतर छठव्रती पारण करून उपवास सोडतात.

सूर्यदेव आणि छठी मैयाप्रती असलेली अढळ श्रद्धा, भक्ती, संयम आणि शिस्त यांचा अनोखा संगम या महापर्वातून पाहायला मिळतो. विशेषतः उत्तर भारतीय समाजात या सणाला अनन्यसाधारण धार्मिक आणि सांस्कृतिक महत्त्व आहे. अंबाझरी घाटावरील आयोजनामुळे नागपूरमध्ये उत्तर भारतीय संस्कृतीचे दर्शन घडण्यासोबतच धार्मिक श्रद्धा आणि सामाजिक एकतेचा संदेशही अधोरेखित झाला.

Show More

Related Articles

Leave a Reply

Your email address will not be published. Required fields are marked *

Back to top button