बी.ई.पर्यंत शिक्षण घेतलेल्या कलाकाराचा अनोखा संकल्प; दरवर्षी स्वतःच्या हातांनी घडवतात शंभर टक्के पर्यावरणपूरक मूर्ती
वाढत्या प्रदूषणाच्या पार्श्वभूमीवर पर्यावरण संरक्षणाचा संदेश देणारा एक प्रेरणादायी उपक्रम वर्धा जिल्ह्यातून समोर आला आहे. ग्रामीण भागात राहणाऱ्या परेश सावरकर या कलाकाराने केवळ वाळू आणि मातीचा वापर करून दुर्गामातेची भव्य आणि हुबेहूब मूर्ती साकारली आहे. विशेष म्हणजे, दरवर्षी स्वतःच्या हातांनी पर्यावरणपूरक मूर्ती तयार करण्याची परंपरा त्यांनी जपली असून, नवरात्रोत्सवानंतर या मूर्तीचे विसर्जनही ते घरीच करतात.
वर्धा जिल्ह्यातील ग्रामीण भागात राहणाऱ्या परेश सावरकर यांना लहानपणापासूनच मूर्ती घडविण्याची आवड आहे. अभियांत्रिकी शाखेतून बी.ई.पर्यंत शिक्षण घेतल्यानंतरही त्यांनी आपल्या कलागुणांना जपले आहे. याच आवडीतून त्यांनी यंदाही वाळू आणि मातीचा वापर करून दुर्गामातेची आकर्षक आणि हुबेहूब मूर्ती साकारली आहे. ही मूर्ती तयार करण्यासाठी त्यांना तब्बल एक महिन्याचा कालावधी लागला.
परेश सावरकर यांचे वैशिष्ट्य म्हणजे ते दरवर्षी आपल्या घरी स्वतःच्या हातांनी पर्यावरणपूरक दुर्गामूर्ती तयार करतात. मूर्ती तयार करण्यापासून ते विसर्जनापर्यंत पर्यावरणाची काळजी घेतली जाते. नवरात्रोत्सवानंतर मूर्तीचे विसर्जनही ते घरीच करतात. त्यामुळे नदी, नाले आणि जलस्रोतांचे प्रदूषण टाळण्यास मदत होते.
सध्या प्लास्टर ऑफ पॅरिसच्या (पीओपी) मूर्तींमुळे जलप्रदूषणाचा प्रश्न गंभीर होत असताना परेश सावरकर यांचा हा उपक्रम पर्यावरण संवर्धनाच्या दृष्टीने महत्त्वाचा ठरत आहे. धार्मिक श्रद्धा जपत निसर्गाचे रक्षण कसे करता येऊ शकते, याचा आदर्श त्यांनी आपल्या कृतीतून समाजासमोर ठेवला आहे.
परेश यांनी साकारलेल्या दुर्गामातेच्या सुंदर मूर्तीची चर्चा परिसरात होत असून, ही कलाकृती पाहण्यासाठी आजूबाजूच्या भागातील नागरिक त्यांच्या घरी गर्दी करत आहेत. केवळ कलेचे प्रदर्शन न करता पर्यावरण संवर्धनाचा संदेश देणाऱ्या परेश सावरकर यांच्या या उपक्रमाचे सर्वत्र कौतुक होत आहे.
