पांगरी, नवघरे, बोरगावमधील शेतकऱ्यांचा आरोप; कोल्ही प्रकल्प परिसरासह काही भागात वीजपुरवठा सुरू असल्याचा दावा
वाशिम जिल्ह्यात महावितरणच्या कारभारावरून शेतकऱ्यांचा संताप उफाळून आला आहे. पांगरी, नवघरे आणि बोरगाव परिसरातील शेतकऱ्यांची वीज जोडणी तोडण्यात आल्याचा दावा करण्यात आला आहे. मात्र, दुसरीकडे कोल्ही लघुपाटबंधारे प्रकल्प परिसरासह काही भागात वीजपुरवठा सुरू असल्याचं शेतकऱ्यांचं म्हणणं आहे. त्यामुळे शेतकऱ्यांसाठी वेगळे आणि इतरांसाठी वेगळे निकष का, असा सवाल उपस्थित केला जात आहे.
वाशिम जिल्ह्यात महावितरण आणि लघुपाटबंधारे विभागाच्या कारभारावरून शेतकऱ्यांमध्ये नाराजी निर्माण झाली आहे. पांगरी, नवघरे आणि बोरगाव परिसरातील काही शेतकऱ्यांचे विद्युत कनेक्शन पाच दिवसांपूर्वी तोडण्यात आल्याचा दावा करण्यात आला आहे.
मात्र, दुसरीकडे मालेगाव हद्दीतील कोल्ही लघुपाटबंधारे प्रकल्पाच्या मुख्य प्रवेशद्वाराजवळ तसेच नगरपंचायतीच्या डम्पिंग ग्राउंड परिसरात वीजपुरवठा सुरू असल्याचा आरोप शेतकऱ्यांनी केला आहे. याशिवाय खडकी आणि मसला परिसरातही वीजपुरवठा सुरळीत असल्याचं शेतकऱ्यांचं म्हणणं आहे.
ग्रामीण भागात अधिकृत कोटेशन किंवा विद्युत जोडणी नसतानाही काही ठिकाणी विहिरींमधून वीज वापरली जात असल्याचा आरोपही करण्यात आला आहे. अशा प्रकारांकडे दुर्लक्ष करून केवळ शेतकऱ्यांवरच कारवाई का केली जाते, असा सवाल उपस्थित करत शेतकऱ्यांनी नाराजी व्यक्त केली आहे.
वीजपुरवठ्याबाबत समान निकष लागू करण्याची मागणी करत शेतकऱ्यांनी संबंधित विभागाला आंदोलनाचा इशाराही दिला आहे. त्यामुळे आता महावितरण आणि लघुपाटबंधारे विभाग या आरोपांवर नेमकं काय स्पष्टीकरण देतात, हे पाहणं महत्त्वाचं ठरणार आहे.
वीजपुरवठ्याच्या कथित दुहेरी निकषांबाबत शेतकऱ्यांनी थेट सवाल उपस्थित केला आहे. त्यामुळे संबंधित विभागाने या आरोपांची चौकशी करून वस्तुस्थिती स्पष्ट करावी आणि सर्वांसाठी समान नियम लागू करावेत, अशी मागणी आता जोर धरू लागली आहे.
