फॉरेस्ट कॉलनी परिसरात चाकूने वार करून जीवे मारण्याचा प्रयत्न; एक आरोपी अटक

मोपेडला धडक दिल्याच्या कारणावरून वाद; दोघांवर चाकूने हल्ला, एकाची प्रकृती गंभीर

अमरावती : अमरावती शहरातील फॉरेस्ट कॉलनी परिसरात मोपेडला मोटारसायकलींची धडक झाल्यानंतर झालेल्या वादातून दोन तरुणांवर चाकूने हल्ला केल्याची धक्कादायक घटना समोर आली आहे. या हल्ल्यात एकाच्या पोटात चाकू अडकल्याने त्याला गंभीर दुखापत झाली असून ICU मध्ये उपचार सुरू आहेत. या प्रकरणी फ्रेजरपुरा पोलिसांनी एका आरोपीला अटक केली आहे.

पोलिसांनी दिलेल्या माहितीनुसार, 5 ऑक्टोबर 2026 रोजी रात्री सुमारे 12.15 वाजता फिर्यादी स्वप्निल रत्नभोज शिंदे, वय 23 वर्षे, रा. खुर्शीपार, ता. जि. भंडारा, हा त्याचा मावस भाऊ पियुश मेश्राम याच्यासोबत मोपेडने भंडारा येथे जात होता. फॉरेस्ट कॉलनीसमोरील रस्त्यावर समोरून चुकीच्या दिशेने आलेल्या तीन मोटारसायकलींनी त्यांच्या मोपेडला धडक दिल्याचे पोलिसांनी सांगितले.

धडकेबाबत विचारणा केली असता संबंधित व्यक्तींनी स्वप्निल शिंदे आणि पियुश मेश्राम यांच्यासोबत वाद घालत मारहाण केल्याचा आरोप आहे. त्यानंतर एका आरोपीने स्वप्निल शिंदे यांच्या डाव्या हाताच्या मनगटाच्या वरच्या भागावर चाकूने वार केला, तर दुसऱ्या आरोपीने पियुश मेश्राम यांच्या पोटावर चाकूने वार केल्याचे फिर्यादीत नमूद करण्यात आले आहे.

पियुशच्या पोटात चाकू अडकल्याने गंभीर दुखापत

चाकूच्या हल्ल्यात पियुश मेश्राम यांच्या पोटात चाकू अडकल्याने त्यांना गंभीर दुखापत झाली. त्यांना उपचारासाठी ICU मध्ये दाखल करण्यात आले असून स्वप्निल शिंदे यांच्यावरही उपचार सुरू असल्याची माहिती पोलिसांनी दिली.

या प्रकरणी फ्रेजरपुरा पोलीस ठाण्यात गुन्हा क्रमांक 879/2026 दाखल करण्यात आला असून BNS कलम 109(1), 189(2), 189(4) आणि 190 अन्वये गुन्हा नोंदवण्यात आला आहे.

सात जणांची नावे निष्पन्न

पोलिसांच्या माहितीनुसार, या प्रकरणात सोहम, अंशुल, रामा कैथवास, अथर्व, क्रिश बनसोड, मंजीत आणि अद्वैत यांच्यासह इतरांची नावे निष्पन्न झाली आहेत. पोलिसांच्या म्हणण्यानुसार, आरोपी क्रिश बनसोड याच्याविरुद्ध यापूर्वीही शरीराविरुद्धच्या गंभीर स्वरूपाचे गुन्हे दाखल असल्याचे तपासात समोर आले आहे.

या प्रकरणातील क्रिश बनसोड याला अटक करण्यात आली असून इतर आरोपींचा शोध सुरू आहे. उर्वरित आरोपींनी कायद्याच्या कचाट्यात यावे, अन्यथा त्यांच्याविरुद्ध कठोर कायदेशीर कारवाई करण्यात येईल, असा इशारा पोलिसांनी दिला आहे.

तसेच आरोपींना आश्रय, मदत किंवा संरक्षण देणाऱ्यांवरही कायद्यानुसार कारवाई केली जाईल, असे पोलिसांनी स्पष्ट केले आहे.

पुरावे आणि साक्षीदारांच्या आधारे तपास

फ्रेजरपुरा पोलिसांनी घटनास्थळाची पाहणी केली असून उपलब्ध पुरावे आणि साक्षीदारांच्या आधारे पुढील तपास सुरू आहे.

ही कारवाई पोलीस आयुक्त राकेश ओला, पोलीस उपायुक्त यशवंत सोळंके, परिमंडळ-1, सहायक पोलीस आयुक्त नयन अलुरकर, फ्रेजरपुरा विभाग यांच्या मार्गदर्शनाखाली तसेच वरिष्ठ पोलीस निरीक्षक रविंद्र राजुलवार यांच्या नेतृत्वाखाली करण्यात आली.

कारवाईमध्ये DB प्रमुख PSI राहुल महाजन, PSI विश्वजीत सरनाईक, PSI प्रवीण इखार यांच्यासह फ्रेजरपुरा पोलीस ठाण्यातील अधिकारी व अंमलदार सहभागी झाले.