पावसाळ्यातील अपघात रोखण्यासाठी अमरावती ग्रामीण पोलिसांचे ‘ऑपरेशन कवच’!
अपघातप्रवण मार्गांवर अचानक नाकाबंदी; विनाहेल्मेट वाहनचालकांवर कारवाई, वेगावर नियंत्रण ठेवण्याचे आवाहन
अमरावती : पावसाळ्यात रस्ते निसरडे होणे, ठिकठिकाणी पाणी साचणे आणि वाहनांचा वेग यामुळे अपघातांचा धोका वाढतो. या पार्श्वभूमीवर अमरावती जिल्हा ग्रामीण पोलिसांकडून अपघातांना आळा घालण्यासाठी विशेष मोहीम सुरू करण्यात आली आहे. पोलीस अधीक्षक निकेतन कदम यांच्या मार्गदर्शनाखाली ‘ऑपरेशन कवच’ राबविण्यात येत असून, अपघातप्रवण मार्गांवर अचानक नाकाबंदी करून वाहनांची तपासणी केली जात आहे.
धारणी, चिखलदरा आणि अंजनगाव परिसरासह महाराष्ट्र-मध्य प्रदेश मार्गावर पोलिसांकडून विशेष लक्ष केंद्रित करण्यात आले आहे. या मार्गांवर अचानक नाकाबंदी करत वाहनचालकांकडून वाहतूक नियमांचे पालन केले जात आहे की नाही, याची तपासणी केली जात आहे.
पावसाळ्यात रस्त्यांवर पाणी साचल्याने तसेच रस्ते निसरडे झाल्याने वाहनावरील नियंत्रण सुटण्याची शक्यता वाढते. त्यातच भरधाव वेगामुळे अपघाताचा धोका आणखी वाढू शकतो. त्यामुळे पोलिसांकडून वाहनचालकांना विशेष खबरदारी घेण्याचे आवाहन करण्यात येत आहे.
या मोहिमेदरम्यान विनाहेल्मेट दुचाकी चालविणाऱ्या वाहनचालकांवर कारवाई करण्यात येत आहे. वाहनचालकांनी पावसाळ्यात रस्त्याची परिस्थिती लक्षात घेऊन वाहनांचा वेग नियंत्रित ठेवावा, पुढील वाहनापासून सुरक्षित अंतर राखावे आणि दुचाकीस्वारांनी हेल्मेटचा वापर करावा, असे पोलिसांकडून सांगण्यात येत आहे.
‘ऑपरेशन कवच’च्या माध्यमातून केवळ वाहतूक नियमांचे उल्लंघन करणाऱ्यांवर कारवाई करण्याचा उद्देश नसून, नागरिकांमध्ये रस्ता सुरक्षेबाबत जनजागृती करण्यावरही भर दिला जात आहे. अपघातप्रवण मार्गांवर पोलिसांची अचानक नाकाबंदी आणि वाहन तपासणी सुरू असल्याने वाहनचालकांनी वाहतूक नियमांचे पालन करण्याचे आवाहन करण्यात आले आहे.
पावसाळ्यात नागरिकांची सुरक्षितता लक्षात घेऊन अमरावती जिल्हा ग्रामीण पोलिसांची ही विशेष मोहीम सुरू असून, सुरक्षित प्रवासासाठी वेगावर नियंत्रण, हेल्मेटचा वापर आणि वाहतूक नियमांचे पालन करण्याचे आवाहन पोलिसांकडून करण्यात आले आहे.
