बडनेरात अवैध सावकारीविरोधात सहकार विभागाची धडक कारवाई; शर्मा कुटुंबाच्या चार मालमत्तांवर छापे

चार ठिकाणी एकाच वेळी तपासणी; इसार चिठ्ठ्या, खरेदीखत, सातबारा उतारे आणि कोरे स्टॅम्प आढळले

अमरावती | प्रतिनिधी

अमरावतीच्या बडनेरा परिसरात कथित अवैध सावकारीचा व्यवसाय सुरू असल्याच्या तक्रारीनंतर सहकार विभागाने मोठी कारवाई केली आहे. शर्मा कुटुंबाशी संबंधित चार वेगवेगळ्या मालमत्तांवर एकाच वेळी पथकांनी तपासणी केली. या कारवाईदरम्यान दोन ठिकाणी महत्त्वाची कागदपत्रे आढळून आली असून, त्यांची महाराष्ट्र सावकारी नियमन अधिनियम 2014 मधील तरतुदींनुसार पडताळणी केली जाणार आहे.

गुरुवारी सकाळी 11 ते दुपारी 2 या वेळेत ही कारवाई करण्यात आली. सहकार विभागाने यासाठी चार स्वतंत्र पथके तयार केली होती. या पथकांनी बडनेरा परिसरातील चार वेगवेगळ्या ठिकाणी एकाच वेळी तपासणी केली.

तक्रारी प्राप्त झालेल्या व्यक्तींशी संबंधित सुभाष चौक परिसरातील दोन घरे, नव्या वस्तीतील निवासस्थान तसेच बडनेरा रोडवरील फार्महाऊस येथे तपासणी करण्यात आली.

कारवाईदरम्यान दोन ठिकाणी इसार चिठ्ठ्या, खरेदीखत, सातबारा उतारे आणि कोरे स्टॅम्प यांसह काही कागदपत्रे आढळून आल्याची माहिती सहकार विभागाने दिली आहे. तर उर्वरित दोन ठिकाणी कोणतेही आक्षेपार्ह दस्तऐवज आढळले नसल्याचे विभागाकडून सांगण्यात आले.

विभागीय सहनिबंधक गौतम वर्धन आणि जिल्हा उपनिबंधक राजेश भुयार यांच्या मार्गदर्शनाखाली ही कारवाई करण्यात आली. तिवसा येथील सहाय्यक निबंधक प्रीती धामणे, नांदगाव खंडेश्वरचे सहाय्यक निबंधक सचिन पतंगे, सहकार अधिकारी अविनाश महल्ले यांच्यासह इतर अधिकारी आणि कर्मचारी या कारवाईत सहभागी झाले.

दरम्यान, आढळून आलेल्या कागदपत्रांची महाराष्ट्र सावकारी नियमन अधिनियम 2014 मधील तरतुदींनुसार सखोल पडताळणी केली जाणार आहे. पडताळणी आणि पुढील चौकशीनंतरच या प्रकरणात कायदेशीर कारवाईबाबत निर्णय घेतला जाणार आहे.

बडनेरा शहर आणि परिसरात कथित अवैध सावकारीबाबत इतरही तक्रारी असल्याची चर्चा आहे. त्यामुळे प्रशासनाकडून पुढील काळात आणखी कारवाई होते का, याकडे आता सर्वांचे लक्ष लागले आहे.

बडनेरात अवैध सावकारीविरोधात सहकार विभागाची मोठी धडक कारवाई! तक्रारीनंतर शर्मा कुटुंबाच्या मालमत्तांवर एकाच वेळी छापे टाकण्यात आले. घर, निवासस्थान आणि फार्महाऊस अशा तब्बल चार ठिकाणी सहकार विभागाच्या पथकांनी तपासणी केली. या कारवाईत दोन ठिकाणी इसार चिठ्ठ्या, खरेदीखत, सातबारा उतारे आणि कोरे स्टॅम्पसह काही कागदपत्रे आढळून आली आहेत. आता या कागदपत्रांची महाराष्ट्र सावकारी नियमन अधिनियमातील तरतुदींनुसार पडताळणी केली जाणार आहे. बडनेरा परिसरातील कथित अवैध सावकारीविरोधातील ही कारवाई नेमकी काय आहे? पाहूया संपूर्ण रिपोर्ट.

चार ठिकाणी एकाच वेळी तपासणी, दोन ठिकाणी महत्त्वाची कागदपत्रे आणि आता सावकारी कायद्यानुसार त्यांची सखोल पडताळणी! बडनेरा परिसरातील कथित अवैध सावकारीविरोधात सहकार विभागाने कारवाईचा स्पष्ट संदेश दिला आहे. आढळून आलेल्या कागदपत्रांतून नेमकी काय माहिती समोर येते आणि चौकशीनंतर कोणावर कारवाई होते, हे आता पुढील तपासातून स्पष्ट होणार आहे.