नागपुरात प्रतिबंधित सुगंधित तंबाखूचा साठा जप्त
अन्न व औषध प्रशासन आणि गुन्हे शाखेची संयुक्त कारवाई; हुडकेश्वर परिसरातील घरावर छापा
नागपूर | प्रतिनिधी
नागपूर शहरातील हुडकेश्वर परिसरात अन्न व औषध प्रशासन आणि नागपूर गुन्हे शाखेने संयुक्त कारवाई करत प्रतिबंधित सुगंधित तंबाखूचा साठा जप्त केला. या कारवाईमुळे राज्यात बंदी असलेल्या तंबाखूजन्य पदार्थांच्या अवैध साठेबाजीचा प्रश्न पुन्हा ऐरणीवर आला आहे.
पोलिसांनी दिलेल्या माहितीनुसार, हुडकेश्वर पोलीस ठाण्याच्या हद्दीतील इंगोले नगर परिसरात प्रतिबंधित तंबाखूचा साठा असल्याची माहिती गुन्हे शाखेला मिळाली होती. त्यानंतर अन्न सुरक्षा अधिकारी शीतल देशपांडे यांच्या उपस्थितीत संयुक्त पथकाने संबंधित ठिकाणी छापा टाकला.
प्लॉट क्रमांक १६४ येथील घराची तपासणी केली असता महाराष्ट्र शासनाने प्रतिबंधित केलेल्या ‘गोल्डन सफारी ९९९’ या सुगंधित तंबाखूचा साठा आढळून आला. कारवाईदरम्यान जतीन जयप्रकाश शाहू हा युवक घटनास्थळी उपस्थित असल्याची माहिती अधिकाऱ्यांनी दिली.
या प्रकरणी अन्न सुरक्षा व मानके कायदा, २००६ तसेच महाराष्ट्र शासनाच्या संबंधित अधिसूचनेनुसार कारवाई करण्यात आली असून जप्त करण्यात आलेल्या प्रतिबंधित तंबाखूचा पंचनामा करण्यात आला आहे. पुढील तपास संबंधित यंत्रणांकडून सुरू आहे.
राज्यात गुटखा, पान मसाला आणि सुगंधित तंबाखूच्या विक्री व साठवणुकीवर बंदी असतानाही अशा प्रकारची अवैध साठेबाजी सुरू असल्याचे या कारवाईतून पुन्हा समोर आले आहे. या प्रकरणात आणखी कोणाचा सहभाग आहे का, याचाही तपास सुरू असून पुढील तपासानंतर अधिक माहिती स्पष्ट होणार आहे.
