जरीपटका मोबाईल चोरीचा पर्दाफाश; मुख्य आरोपी अटकेत, २५ मोबाईल जप्त

४.०८ लाखांचा मुद्देमाल हस्तगत; एका अल्पवयीन साथीदारालाही ताब्यात

नागपूर | प्रतिनिधी

नागपूरच्या जरीपटका परिसरातील मोबाईल दुकान फोडून लाखो रुपयांचे मोबाईल चोरी करणाऱ्या चोरट्यांचा पोलिसांनी पर्दाफाश केला आहे. गुप्त माहितीच्या आधारे कारवाई करत मुख्य आरोपीला अटक करण्यात आली असून त्याच्याकडून चोरीतील २५ मोबाईल फोन आणि गुन्ह्यात वापरलेली दुचाकी असा सुमारे ४ लाख ८ हजार रुपयांचा मुद्देमाल जप्त करण्यात आला आहे. या प्रकरणात एका अल्पवयीन साथीदारालाही ताब्यात घेण्यात आले आहे.

जरीपटका पोलीस ठाण्याच्या हद्दीतील एका मोबाईल दुकानात घरफोडी करून सुमारे २५ मोबाईल फोन चोरीला गेल्याची घटना काही दिवसांपूर्वी घडली होती. या प्रकरणाचा तपास सुरू असताना पोलिसांना गुप्त माहिती मिळाली की, आरोपी लकडगंज परिसरात फिरत आहे.

या माहितीच्या आधारे पोलिसांनी सापळा रचून संशयिताला ताब्यात घेतले. चौकशीदरम्यान त्याने आपले नाव गणेश तांडे असल्याचे सांगत चोरीची कबुली दिली. पुढील तपासात शुभम कावरे याचाही या गुन्ह्यात सहभाग असल्याचे समोर आले. यापैकी एक साथीदार अल्पवयीन असल्याचेही पोलिस तपासात निष्पन्न झाले.

पोलिसांनी आरोपींकडून चोरीतील सुमारे ४ लाख ८ हजार रुपयांचे २५ मोबाईल फोन तसेच चोरीसाठी वापरण्यात आलेली एक दुचाकी जप्त केली आहे. या कारवाईमुळे जरीपटका परिसरातील मोबाईल चोरीच्या मोठ्या गुन्ह्याचा उलगडा करण्यात पोलिसांना यश आले आहे.

या प्रकरणातील आरोपींची अधिक चौकशी सुरू असून, या टोळीने इतर ठिकाणीही अशाच प्रकारचे गुन्हे केले आहेत का, याचा तपास पोलीस करत आहेत. वेगवान तपास आणि गुप्त माहितीच्या आधारे अल्पावधीतच चोरीचा छडा लावल्याबद्दल जरीपटका पोलिसांच्या कारवाईचे कौतुक होत आहे.