नागपूरमध्ये बेकायदेशीर हुक्का पार्लरवर पोलिसांची धडक कारवाई; 11 जणांवर गुन्हा दाखल
नागपूर शहरात बेकायदेशीररित्या चालवल्या जाणाऱ्या हुक्का पार्लरविरोधात गुन्हे शाखेने मोठी कारवाई करत हुक्का व्यवसायिकांना जोरदार दणका दिला आहे. सीताबर्डी परिसरातील एका कॅफेमध्ये ग्राहकांना तंबाखूजन्य पदार्थांसह हुक्का पुरविला जात असल्याची गुप्त माहिती पोलिसांना मिळाली होती. या माहितीच्या आधारे गुन्हे शाखेच्या पथकाने धाड टाकत कारवाई केली असून तब्बल 11 जणांविरुद्ध गुन्हा दाखल करण्यात आला आहे.
नागपूर गुन्हे शाखेच्या युनिट क्रमांक 2 ला सीताबर्डी परिसरातील सेकंड फ्लोर कॅफेमध्ये बेकायदेशीररित्या हुक्का सेवा दिली जात असल्याची माहिती मिळाली होती. या माहितीची खात्री झाल्यानंतर पोलिसांनी दोन पंचांच्या उपस्थितीत कॅफेवर छापा टाकला.
कारवाईदरम्यान कॅफेमध्ये अनेक ग्राहक हुक्क्याचा आनंद घेत असल्याचे पोलिसांच्या निदर्शनास आले. तपासणीमध्ये हुक्का पॉटमध्ये तंबाखूजन्य पदार्थ भरून ग्राहकांना सेवा पुरविली जात असल्याचे स्पष्ट झाले. यानंतर पोलिसांनी तत्काळ कारवाई करत कॅफेचा मालक सन्नी विकास बोरकर, व्यवस्थापक साजू सादिक खान यांच्यासह एकूण 11 जणांविरुद्ध कोटपा (COTPA) कायद्याअंतर्गत गुन्हा दाखल केला.
या धाडीत पोलिसांनी 7 हुक्का पॉट, 12 हुक्का नळ्या, विविध इलेक्ट्रॉनिक डिव्हाइस तसेच हुक्का सेवेसाठी वापरण्यात येणारे इतर साहित्य जप्त केले. जप्त करण्यात आलेल्या मुद्देमालाची एकूण किंमत 20 हजार 800 रुपये असल्याची माहिती पोलिसांनी दिली आहे.
विशेष म्हणजे, अलिकडच्या काळात तरुणांमध्ये हुक्क्याचे वाढते आकर्षण पाहता अशा बेकायदेशीर हुक्का पार्लरवर कारवाई करण्यासाठी नागपूर पोलीस विशेष मोहीम राबवत आहेत. सार्वजनिक आरोग्यावर होणारे दुष्परिणाम लक्षात घेऊन तंबाखूजन्य पदार्थांच्या वापरावर नियंत्रण आणण्यासाठी पोलिसांकडून सातत्याने कारवाई केली जात आहे.
या कारवाईनंतर शहरातील इतर हुक्का पार्लर चालकांमध्येही खळबळ उडाली असून पोलिसांनी स्पष्ट इशारा दिला आहे की, बेकायदेशीरपणे हुक्का सेवा पुरविणाऱ्यांविरुद्ध भविष्यातही कठोर कारवाई सुरू राहणार आहे. कायद्याचे उल्लंघन करणाऱ्यांना कोणतीही सवलत दिली जाणार नसल्याचे पोलिसांनी स्पष्ट केले आहे.
दरम्यान, या प्रकरणाचा पुढील तपास सीताबर्डी पोलीस करीत असून जप्त करण्यात आलेल्या साहित्याची तपासणी केली जात आहे. तसेच या व्यवसायामागे आणखी कोणी सहभागी आहे का याचाही शोध पोलीस घेत आहेत.
नागपूरमध्ये झालेल्या या धडक कारवाईमुळे बेकायदेशीर हुक्का पार्लर चालवणाऱ्यांचे धाबे दणाणले असून शहरातील अशा प्रकारच्या व्यवसायांवर पोलिसांचा वचक आणखी वाढल्याचे चित्र दिसून येत आहे.
