गोदावरीत मोठी दुर्घटना टळली! भाविकांनी भरलेली बोट उलटली; स्थानिकांच्या तत्परतेमुळे अनेकांचे प्राण वाचले
बीड जिल्ह्यातील पुरुषोत्तम पुरी येथे आज मोठी दुर्घटना घडता घडता टळली. अधिक मासानिमित्त गोदावरी नदीकाठी भाविकांची मोठी गर्दी असताना प्रवाशांनी भरलेली एक बोट अचानक उलटल्याने परिसरात एकच खळबळ उडाली. सुदैवाने बोट नदीच्या काठाजवळ उलटल्यामुळे आणि स्थानिक नागरिकांनी तत्काळ बचावकार्य सुरू केल्यामुळे मोठी जीवितहानी टळली. मात्र या दुर्घटनेत काही भाविक गंभीर जखमी झाले असून त्यांच्यावर उपचार सुरू आहेत.
मिळालेल्या माहितीनुसार, अधिक मासानिमित्त पुरुषोत्तम पुरी येथे हजारो भाविक दर्शनासाठी आणि धार्मिक विधींसाठी दाखल झाले होते. याचदरम्यान गोदावरी नदीत प्रवाशांना घेऊन जाणारी बोट अचानक असंतुलित झाली आणि काही क्षणांतच उलटली. प्रत्यक्षदर्शींनी दिलेल्या माहितीनुसार, बोटीत क्षमतेपेक्षा जास्त प्रवासी बसविण्यात आले होते. त्यामुळे बोटीचा तोल जाऊन ही दुर्घटना घडल्याचा प्राथमिक अंदाज व्यक्त केला जात आहे.
बोट उलटताच नदीत एकच गोंधळ उडाला. महिला, पुरुष आणि वृद्ध भाविक जीव वाचवण्यासाठी आटोकाट प्रयत्न करू लागले. अनेक जण पाण्यात फेकले गेल्याने काही काळ भीतीचे वातावरण निर्माण झाले होते. मात्र परिसरातील स्थानिक नागरिकांनी प्रसंगावधान राखत तत्काळ नदीत उड्या घेतल्या आणि बचावकार्य सुरू केले. त्यांच्या धाडसी प्रयत्नांमुळे अनेक भाविकांना सुरक्षित बाहेर काढण्यात यश आले.
या दुर्घटनेत चार ते पाच जण गंभीर जखमी झाल्याची माहिती समोर आली असून त्यांना तातडीने जवळच्या रुग्णालयात दाखल करण्यात आले आहे. सध्या त्यांच्यावर उपचार सुरू असून त्यांची प्रकृती स्थिर असल्याचे सांगितले जात आहे.
दरम्यान, बोटीत प्रवास करणाऱ्या काही महिलांनी बोट चालकावर गंभीर आरोप केले आहेत. त्यांच्या म्हणण्यानुसार, बोट आधीच भरलेली असतानाही आणखी प्रवाशांना जबरदस्तीने बसविण्यात आले. क्षमतेबाबत विचारणा केली असता ५० हून अधिक प्रवासी सहज बसू शकतात असे सांगून प्रवाशांना बोटीत चढविण्यात आल्याचा आरोपही करण्यात आला आहे.
विशेष म्हणजे, याच परिसरात काही दिवसांपूर्वी नदीत पोहण्यासाठी गेलेल्या एका युवकाचा बुडून मृत्यू झाला होता. त्यानंतर पुन्हा घडलेल्या या घटनेमुळे प्रशासनाच्या सुरक्षाव्यवस्थेवर प्रश्नचिन्ह उपस्थित केले जात आहे. अधिक मासानिमित्त लाखो रुपयांचा खर्च करून विविध सुविधा उपलब्ध केल्याचा दावा प्रशासनाकडून केला जात असला, तरी प्रत्यक्षात सुरक्षा व्यवस्था अपुरी असल्याचा आरोप स्थानिक नागरिक आणि भाविकांकडून करण्यात येत आहे.
या घटनेनंतर गोदावरी नदीतील बोट वाहतुकीच्या नियमांचे पालन होत आहे का, क्षमतेपेक्षा जास्त प्रवासी वाहतूक करणाऱ्यांवर कारवाई का होत नाही, आणि भाविकांच्या सुरक्षेसाठी पुरेशी उपाययोजना करण्यात आल्या आहेत का, असे अनेक प्रश्न उपस्थित होत आहेत. आता या प्रकरणाची सखोल चौकशी करून दोषींवर कठोर कारवाई करण्याची मागणी जोर धरू लागली आहे. प्रशासन या घटनेकडे किती गांभीर्याने पाहते आणि भविष्यात अशा दुर्घटना टाळण्यासाठी कोणती पावले उचलते, याकडे सर्वांचे लक्ष लागले आहे.
