अमरावतीत वीजपुरवठ्याचा बोजवारा? मध्यरात्री नागरिकांचा दसरा मैदान उपकेंद्रावर धडक मोर्चा
अमरावती शहरातील वारंवार होणाऱ्या वीज खंडिततेमुळे नागरिकांचा संताप आता उफाळून आला आहे. गेल्या अनेक दिवसांपासून रात्रीच्या वेळी अचानक वीजपुरवठा खंडित होणे, तासन्तास अंधारात कुटुंबांसह बसावे लागणे आणि तक्रार केल्यानंतरही महावितरणकडून ठोस उत्तर न मिळणे, यामुळे नागरिकांमध्ये तीव्र नाराजी निर्माण झाली आहे. अखेर या त्रासाला कंटाळून महालक्ष्मी नगर, रवी नगर, महादेव नगर, अंबा कॉलनी आणि परिसरातील नागरिकांनी मध्यरात्री थेट दसरा मैदान विद्युत वितरण उपकेंद्र गाठत आपला संताप व्यक्त केला.
मिळालेल्या माहितीनुसार, दसरा मैदान उपकेंद्राच्या अखत्यारित येणाऱ्या अनेक भागांमध्ये गेल्या काही दिवसांपासून नियमितपणे रात्रीच्या वेळी वीजपुरवठा खंडित होत आहे. अचानक वीज जाणे, अनेक तास वीज न येणे आणि त्यामुळे नागरिकांचे दैनंदिन जीवन विस्कळीत होणे, ही समस्या आता गंभीर स्वरूप धारण करत असल्याचे नागरिकांचे म्हणणे आहे.
नागरिकांनी सांगितले की, वीज गेल्यानंतर उपकेंद्राशी संपर्क साधला असता “फेस उडाला आहे”, “काम सुरू आहे”, “सबस्टेशन डाउन झाले आहे”, “लोड जास्त झाल्याने ट्रिप झाली आहे” अशीच ठरलेली उत्तरे वारंवार दिली जातात. मात्र प्रत्यक्षात समस्या कधी सुटेल याबाबत कोणतीही स्पष्ट माहिती दिली जात नसल्याचा आरोप करण्यात आला आहे.
याच पार्श्वभूमीवर संतप्त नागरिकांनी मध्यरात्री थेट दसरा मैदान उपकेंद्रात धाव घेतली. मात्र तेथे पोहोचल्यानंतर त्यांना धक्काच बसला. उपकेंद्राच्या कार्यालयात एकही जबाबदार अधिकारी किंवा कर्मचारी उपस्थित नसल्याचे नागरिकांनी सांगितले. विशेष म्हणजे कार्यालयातील दिवे, पंखे आणि कूलर सुरू असल्याचे दिसून आले. त्यामुळे उपकेंद्रात वीज उपलब्ध असताना नागरिकांच्या घरात मात्र अंधार का, असा संतप्त सवाल उपस्थित करण्यात आला.
नागरिकांनी कार्यालयातील तक्रार नोंदवहीची पाहणी केली असता ग्राहकांच्या तक्रारींची कोणतीही नियमित नोंद नसल्याचा आरोपही करण्यात आला. यामुळे तक्रारींचे व्यवस्थापन आणि त्यावर होणारी कार्यवाही याबाबतही प्रश्नचिन्ह निर्माण झाले आहे.
स्थानिक रहिवाशांच्या म्हणण्यानुसार, उपकेंद्राचा दूरध्वनी क्रमांक अनेकदा सतत व्यस्त असतो किंवा फोन उचलला जात नाही. त्यामुळे नागरिकांना रात्री उशिरा लहान मुलांना घेऊन थेट उपकेंद्रात जावे लागत असल्याचे त्यांनी सांगितले. विशेषतः ज्येष्ठ नागरिक, विद्यार्थी आणि लहान मुलांना या परिस्थितीचा मोठा त्रास सहन करावा लागत असल्याचेही नागरिकांनी नमूद केले.
दरम्यान, वेळेवर वीजबिल भरूनही दर्जेदार आणि अखंडित वीजपुरवठा मिळत नसल्याने नागरिकांमध्ये तीव्र नाराजीचे वातावरण आहे. वारंवार होणाऱ्या वीज खंडिततेमुळे घरगुती उपकरणांचे नुकसान, विद्यार्थ्यांच्या अभ्यासात अडथळे आणि नागरिकांच्या दैनंदिन कामकाजावर परिणाम होत असल्याचेही सांगण्यात आले.
नागरिकांनी महावितरण प्रशासनाकडे या संपूर्ण प्रकरणाची उच्चस्तरीय चौकशी करण्याची मागणी केली आहे. वारंवार होणाऱ्या वीज खंडिततेमागील कारणे शोधून त्यावर कायमस्वरूपी उपाययोजना करण्यात याव्यात, तसेच उपकेंद्रातील कामकाजात आढळणाऱ्या त्रुटींवर कारवाई करण्यात यावी, अशी मागणी जोर धरत आहे.
अमरावतीतील दसरा मैदान उपकेंद्राच्या कारभारावर निर्माण झालेल्या या प्रश्नांमुळे आता महावितरण प्रशासन कोणती भूमिका घेते, नागरिकांच्या तक्रारींची दखल घेते का आणि वारंवार अंधारात जाणाऱ्या परिसरांना दिलासा मिळतो का, याकडे संपूर्ण शहराचे लक्ष लागले आहे.
